ԵՐԵՎԱՆ, 12 հունիսի — Sputnik, Նանա Մարտիրոսյան. Կոնդի բնակիչները պահանջում են կրկին չափագրել իրենց տներն ու բակերը։
Հունիսի 12-ին կոնդեցիները բողոքի ակցիա անցկացրեցին կառավարության շենքի դիմաց և հանդիպեցին գործադիր մարմնի ներկայացուցչի հետ։
Իսկ նախապատմությունն այսպիսին է։ Երկար տարիներ խոսվում է Կոնդի բնակիչների բազմաբնակարանային շենքեր տեղափոխելու անհրաժեշտության մասին։ Բազմիցս այդ մասին հայտարարել են և՛ քաղաքային իշխանությունները, և՛ կառուցապատողները, որոնք պատրաստ են ստանձնել տարածքի շինարարությունը։
Կոնդի բնակիչները մտավախություն ունեն, որ եթե գործը հասնի տեղափոխման, ապա իրենց հատկացված բնակարանների մակերեսը ավելի փոքր կլինի ներկայիս տներից։ Խնդիրն այն է, որ սեփականաշնորհման ընթացքում բակային տարածքները հաշվի չեն առել, իսկ բուն տների մակերեսը, բնակիչների պնդմամբ, փաստաթղթերում սխալ է գրված։
Ինչպես Sputnik Արմենիայի թղթակցի հետ զրույցում պատմեց ակցիայի կազմակերպիչ և Կոնդի բնակիչ Նաիրա Երեմյանը` կառավարությունում խնդրել են տրամադրել հստակ տեղեկություն տների քանակի մասին և ներկայացնել համապատասխան փաստաթղթերը։
«Նախկին իշխանությունների օրոք մեզ խաբել էին, չափագրումներ էին իրականացրել, աղավաղել թվերը, դրանք սեփականաշնորհվել էին հաշվի չառնելով բակային տարածքները։ Սխալն ուղղելու և սեփականության վկայականում այդ քառակուսի մետրերը ներառելու բոլոր խնդրանքներին, մեզանից լրացուցիչ գումարներ էին պահանջում։ Մենք մտադիր չենք վճարել սխալի կամ փաստերը դիտավորյալ խեղաթյուրելու համար», – նշեց Երեմյանը։
Նա պարզաբանեց, որ Կոնդի բնակիչների համար կարևոր է բակի յուրաքանչյուր քառակուսի մետրը, որն այսօր կարող է աննշան թվալ։ Չէ՞ որ բազմաբնակարանային շենքում բնակելի մակերեսի պակասն ավելի ուժեղ է զգացվելու։
Երեմյանը նշեց, որ որոշ տներում կան 70-80 քմ մետր մակերեսով բակեր, որտեղ մի քանի ընտանիք է ապրում, և նրանք պահանջում են այդ տարածքները հավասար մասերի բաժանել` ամրագրելով ամեն ինչ փաստաթղթերով։
«Մենք դեմ չենք, որ Կոնդի փեշերին բազմաբնակարանային տներ կառուցեն, իսկ հին տները պահպանեն, բայց սա չի նշանակում, որ մենք հեշտ ու հանգիստ կտանք մեր սեփականությունը կոպեկներով, կամ հենց այնպես կնվիրենք կառուցապատողներին», – նշեց Կոնդի բնակչուհին։
Երեմյանը պատմեց, որ Կոնդի բնակիչների հետ հանդիպման ժամանակ քաղաքի գլխավոր ճարտարապետ Արթուր Մեսչյանը կատակեց, թե նրանք ոսկու վրա են ապրում։ Որոշ բնակիչներ սա ուղիղ իմաստով են հասկացել և նույնիսկ որոշել պեղումներ անցկացնել, մյուսները սա ակնարկ են համարել, թե հողը պետք է տալ միայն նրա շուկայական արժեքով, այլ ոչ թե «կոպեկով»։
Կոնդի հին բնակիչներին բազմիցս են խաբել` թողնելով կամ առանց բնակարանի, կամ քաղաքի ծայրամաս տեղափոխելով։ Այս կապակցությամբ կոնդեցիները մտադիր են ներքին խորհրդակցություն անցկացնել, քննարկել բոլոր ռիսկերը վարչապետի հետ, այնուհետև կամ վերանորոգել սեփական տները, կամ փոխանակել դրանք բնակարանների հետ։
Կոնդը հիմնադրվել էր VII դարում։ Այն «Հին Երևանի» վերջին պահպանված թաղամասն է։ Գտնվում է քաղաքի կենտրոնում, բայց մայրաքաղաքից առանձնացված է։ Երևանի գլխավոր ճարտարապետ Արթուր Մեսչյանը խոստովանել է, որ նա ճիշտ էր համարում XIX դարի վերջի XX դարի սկզբի հայկական մայրաքաղաքի ճարտարապետական տեսքը վերականգնելու «Հին Երևան» նախագծի իրականացումը հենց Կոնդում, քանի որ այս տարածքում են պահպանվել ամենաշատ հին շենքերը, որոնք կարելի է վերակառուցել և օգտագործել տարբեր նպատակներով։
