Ամեն օր այստեղ իջնում են բրոնխների ասթմա, ալերգիա, շնչուղիների հիվանդություններ և վատ իմունիտետ ունեցող մարդիկ։ Տնօրեն Անուշ Ոսկանյանի վստահեցմամբ՝ աղի քարանձավներ սիստեմատիկ այցերը թեթևացնում են մեծահասակների մոտ բրոնխիալ ասթմայի ախտանշանները, իսկ երեխաների դեպքում կարող են նաև բուժել դրանք։
4000 քառակուսի մետր մակերեսով կենտրոնում պացիենտները 6 ժամ են անցկացնում։ Այդ ընթացքում նրանք կարող են սեղանի թենիս և բիլիարդ խաղալ, շնչառական մարմնամարզություն անել, քայլել։ Եվ նույնիսկ քնել հատուկ առանձնացված ննջասենյակում։
Բժիշկները խորհուրդ են տալիս կենտրոն այցելել գոնե 20 անգամ։ Ընդ որում` ամենակարևորն առաջին 7-ն են։ Այդ ընթացքում օրգանիզմն ադապտացվում է խոնավությանը, ջերմաստիճանին, ճնշմանը, թթվածնի իոնային բաղադրությանը։ Քարանձավների ստերիլ օդում ալերգեններ ու բակտերիաներ չկան, իսկ ռադիացիայի մակարդակը գրեթե զրոյական է։
