ԵՐԵՎԱՆ, 10 հունիսի — Sputnik. Իրանի Իսլամական Հանրապետության Մեջլիսը վավերացրել է ԵԱՏՄ-ի հետ ազատ առևտրի ստեղծման մասին համաձայնագիրը: Այս մասին հայտնում է IRNA իրանական գործակալությունը։
Եվրասիական տնտեսական միության երկրների ու Իրանի միջև ժամանակավոր համաձայնագիրը կնքվել է 2018 թվականի մայիսի 17–ին Աստանայի տնտեսական համաժողովի ժամանակ։ Եռամյա համաձայնագրով նախատեսվում է, որ ԵԱՏՄ–ի ու Իրանի միջև ապրանքների որոշ տեսակների համար մաքսատուրքերը կնվազեն կամ կվերացվեն։
Վավերացման օգտին են քվեարկել պատգամավորներից 174–ը, դեմ` 4-ը։ Օրենսդրական մարմնի անդամ Ալդի Ակբար Քարիմին ասել է, որ համաձայնագիրն Իրանի համար մեծ հեռանկարներ է բացում։ Նրա խոսքով` ԵԱՏՄ–ի հետ համագործակցությունը կարող է նախադեպ դառնալ, որպեսզի Իրանն Առևտրի համաշխարհային կազմակերպություն մտնի։ Նրա կարծիքով` այդ համաձայնագրի շնորհիվ Իրանում օտարերկրյա նոր ներդրումներ կլինեն ու աշխատատեղեր կբացվեն։
Համաձայնագիրը կձևավորի ԵԱՏՄ–ի ու Իրանի առևտրի հիմնական կանոնները, որոնք առավելագույնս մոտեցված կլինեն Առևտրի համաշխարհային կազմակերպության կանոններին։
Նշենք` կնքված փաստաթուղթը Իրանի ու ԵԱՏՄ–ի միջև ազատ առևտրի գոտու ստեղծման առաջին փուլն է։
