ԵՐԵՎԱՆ, 7 հունիսի — Sputnik. Մարդասպանների ազգությունը չպետք է ազդի հայ–ռուսական հարաբերությունների վրա։ Սանկտ Պետերբուրգում այս մասին ասել է Հայաստանի վարչապետ Նիկոլ Փաշինյանը` պատասխանելով Sputnik Արմենիայի հարցին Մերձմոսկովյան շրջանում հատուկջոկատայինի աղմկահարույց սպանության մասին, որի համար կասկածում են Հայաստանի քաղաքացիներին։
«Իհարկե, գիտեք` դա ողբերգություն է։ Ցանկանում եմ իմ ցավակցությունը հայտնել սպանվածի ընտանիքին ու ընկերներին, որովհետև, ինչպես ասացիք, դա ազդում է մեր հարաբերությունների վրա», – ասաց Փաշինյանը։
Նա նշեց, որ այդ թեմայի հետ կապված նաև շահարկումներ կան։
«Կան մարդիկ, որոնք կատարում են իրավախախտումներ, սպանություններ թե՛ Հայաստանում, թե՛ Ռուսաստանում, բայց դա ոչ մի կերպ չպետք է ազդի մեր հարաբերությունների վրա։ Այդ դիրքորոշումը սկզբունքային է։ Նշանակություն չունի, թե որ ազգության ներկայացուցիչներն են կատարում դա», – նշեց Փաշինյանը։
Նա հիշեցրեց, որ վերջերս դեպք էր գրանցվել Գյումրիում (հավաքարար կնոջ սպանությունը, որի համար մեղադրում են 201-րդ ռազմակայանի զինծառայողներից մեկին. խմբ.), և հայկական իշխանությունը խափանել է այդ հարցին քաղաքական ենթատեքստ տալու բոլոր փորձերը։
Փաշինյանը կատարվածը մեծ ողբերգություն անվանեց, հույս և վստահություն հայտնեց, որ ռուս եղբայրները դա չեն ընկալի որպես մի բան, որը վերաբերում է երկկողմ, ազգամիջյան և միջպետական հարաբերություններին։
«Դա ոչ մի կերպ կապված չէ մեր հարաբերությունների հետ, որովհետև եթե այդ ամենը կապված լիներ մեր հարաբերությունների հետ, ոչ ոք ոչ մեկին չէր սպանի, որովհետև մենք ունենք ռազմավարական, եղբայրական հարաբերություններ», – ասաց ՀՀ վարչապետը։
Նիկիտա Բելյանկինը սպանվել է Մոսկվայի մարզի Կրասնոգորսկի շրջանի Պուտիլկովո ավանում հունիսի 2–ին գիշերը։ Նա «ԲիրՀաուս» բարի մոտ երկու խմբերի միջև տեղի ունեցող կռվին է ականատես եղել՝ ընկերուհու հետ զբոսնելիս: Նիկիտան որոշել է միջամտել և մի քանի նախազգուշական կրակոց է արձակել գազային ատրճանակից, բայց դանակով սրտին մահացու հարված է ստացել։ Նիկիտան 20 մետր վազել է ու ընկել։
