ԵՐԵՎԱՆ, 6 հունիսի — Sputnik. Այսօր արտառոց դեպք է տեղի ունեցել Լոռու մարզում:
Մեր տեղեկություններով Վանաձորի քրեակատարողական հիմնարկից շտապ հիվանդանոց է տեղափոխվել 36-ամյա կալանավոր: Նախնական վարկածի համաձայն նա սուր կտրող-ծակող առարկայով մասամբ կտրել է պարանոցը:
Քրեակատարողական հիմնարկի աշխատակիցները տեսել են արնաքամ լինող տղամարդուն և շատ արագ տեղափոխել Վանաձորի հիվանդանոց, որտեղ բժիշկները փրկել են նրա կյանքը:
Նա այժմ էլ բժիշկների հսկողության ներքո է: Մեզ չհաջողվեց պարզել, թե ինչ պատճառներով է կալանավորը դիմել այդ ծայրահեղ քայլին:
Մեր տեղեկություններով՝ նա օրերս է կալանավորվել ու տեղափոխվել Վանաձոր քրեակատարողական հիմնարկը: Տղամարդը մեղադրվում է ուրիշի առողջությանը ծանր վնաս պատճառելու մեջ:
