Չպետք է հակադրվեն ներդրումները, աշխատատեղերի ստեղծումը հանքարդյունաբերության ոլորտում և շրջակա միջավայրի պաշտպանություն։ Հենց հակադրվեցին՝ կունենաք խնդիրներ տնտեսական դաշտում, և՛ սոցիալական, և՛ բնության պահպանության։ Sputnik Արմենիայի հետ զրույցում ասել է տնտեսագետ Թադևոս Ավետիսյանը։
Նրա խոսքով աշխարհն այս հարցի լուծումն ունի․ կանաչ տնտեսությունները զարգանում են, բայց զուգահեռ զարգացած երկրները չեն արգելել հանքարդյունաբերությունն իրենց տարածքներում։
Հայաստանը, ըստ Ավետիսյանի՝ պետք է խելամիտ քաղաքականություն վարի՝ հաշվի առնելով շրջակա միջավայրի պաշտպանությունը։ Հանքի շահագործումը պետք է լինի խորքային ուսումնասիրությունների հիման վրա և միջազգային ընդունված չափանիշների համատեքստում, որպեսզի անդառնալի հետևանքներ չունենա շրջակա միջավայրի և մարդու առողջության վրա։
«Բացի այդ, հանքարդյունաբերություն՝ չի նշանակում հանքերի հոշոտում, մինչև վերջ շահագործում։ Չպետք է մի սերունդը ամբողջությամբ օգտագործի հանքերը՝ գալիք սերունդներին ոչինչ չթողնելով․ պետք է ոլորտը կարգավորող նորմեր լինեն»,-ասել է Թադևոս Ավետիսյանը։
Տնտեսագետը նշում է՝ հանքարդյունաբերությունը մեր երկրի համար զարգացման հիմնական ուղղություններից է, և ընդունելի չէ կառավարության մոտեցումը, որ միանգամից 180 աստիճան շրջադարձ է անում և ասում, որ ՀՆԱ-ի հիմնական բաժինը կազմող հանքարդյունաբերութունը պետք է վերանա և նոր, կառուծվածքային փոփոխություն է անում։
Ավետիսյանը վստահ է՝ այս ոլորտում կտրուկ փորձերը կարող են և՛ սոցիալական վնաս հասցնել, և՛ վնասել երկրի ներդրումային վարկանիշին։
