ԵՐԵՎԱՆ, 3 հունիսի — Sputnik. Project LA-ն և երգիչ Գոռ Սուջյանը նոր աշխատանք ունեն: Երգի պրեմիերան կկայանա հունիսի 15-ին սպասվող մեծ համերգի ժամանակ։
Sputnik Արմենիայի հետ զրույցում Գոռը պատմել է ստեղծագործական նորությունների, Project LA–ի հետ համագործակցության, ակումբային համերգների և իր ստեղծագործական նախասիրությունների մասին:
«Հայ մեծ գրողների բանաստեղծությունների հիման վրա գրված երգերի մասին մինչև հիմա դրական արձագանքներ եմ ստանում, վատ արձագանքներ դեռ չեմ լսել։ Ինքս էլ շատ բանաստեղծություններ չգիտեի, բայց այս համագործակցության շնորհիվ սովորեցի»,- անկեղծանում է Գոռը և հավելում, որ մտերիմներն էլ շատ են հավանել նոր երգերը։
Այս համագործակցությունից բացի Գոռ Սուջյանը հաճախ է երևանյան ակումբներում հանդես գալիս որպես անհատ կատարող:
«Ինձ հաճելի է և՛ խմբով, և՛ առանձին հանդես գալը, ելույթների ժամանակ տարբեր զգացողություններ եմ ունենում: Բայց խմբով աշխատելն ինչ-որ առումով ավելի հեշտ է, քանի որ ձեռքերս ավելի ազատ են լինում, էմոցիաներս ամբողջությամբ կենտրոնացնում եմ երգելու վրա: Համեմատաբար ավելի դժվար է, երբ երգելուն զուգահեռ նվագում եմ»,–ասում է երգիչը։
Գոռ Սուջյանի ստեղծագործական նորությունները հիմնականում կապված են Project LA-ի հետ: Նրանք շուտով նոր երգ կներկայացնեն:
Գոռն ինքն էլ է ստեղծագործում։ Ասում է` երգ գրելիս իրեն մոտիվացնում է կյանքն իր բոլոր իմաստներով ու էտապներով: Գրում է թե՛ անգլերեն, թե՛ հայերեն:
«Երաժշտությունն ինքնըստինքյան թելադրում է՝ երգը հայերե՞ն պետք է լինի, թե՞ անգլերեն: Նախընտրում եմ հայերեն գրել, բայց այնպես, ինչպես իմ ականջին է հաճելի։ Օրինակ՝ ինձ համար ավելի երգեցիկ է «ես կուլամ» -ը, քան «Ես լացում եմ»-ը»։
Երգչի խոսքով՝ Հայաստանում ռոք միշտ են լսել, բայց 10 տարի առաջ այս ժանրն ավելի անհասանելի էր, համարվում էր underground և ավելի շատ ակումբներում էր հնչում։
Գոռի կարծիքով ՝ այսօր ռոքը դուրս է եկել ակումբներից և ավելի լայն լսարանին է հասանելի։
