ԵՐԵՎԱՆ, 31 մայիսի — Sputnik. Բրիտանական Daily Mail-ը անդրադարձել է Դաշա անունով արջին ու նրա երկու ձագերին Հայաստանի անտառներում բաց թողնելուն:
«Ես այստեղ եմ Հայաստանում, մենք հենց նոր ազատություն տվեցինք Դաշային և նրա երկու քոթոթներին` Լուկային և Կոկոյին։ Դա անհավանական է, չեմ կարող հավատալ դրան, քանի որ երկու տարի առաջ մենք Դաշային գտանք Երևանում սարսափելի վանդակի մեջ», – ասել է International Animal Rescue կենդանիների փրկության կազմակերպության ղեկավար Ալան Նայթը։
Նրա խոսքով` մեկ տարի նրա մասին հոգ էին տանում ու այսօր նա արդեն բավականին կազդուրվել է և պատրաստ է ապրել ազատության մեջ։
Մասնագետները հետևելու են արջին տեղադրված GPS–ի միջոցով։
«Մենք պետք է վստահ լինենք, որ նրանք կուշտ են, առողջ։ Ես հիացած եմ, ամեն ինչ ծրագրածի նման անցավ», – ասել է Նայթը։
Արջեր Մաշան և Դաշան Երևանի կենդանաբանական այգի էին տեղափոխվել ՀՀ Շիրակի մարզում գտնվող ռեստորանային համալիրներից մեկից 2018 թվականի դեկտեմբերին։Ավելի վաղ բրիտանական Daily Mail պարբերականում հոդված էր հայտնվել Հայաստանում արջերի պահպանման պայմանների մասին։ Արջերից շատերը նեղ վանդակներում են պահվում ` զվարճացնելով ռեստորանի և այլ զվարճանքի վայրերի հաճախորդներին ու այցելուներին։ Արջերին հաճախ սոված են պահում` կերակրելով ռեստորանային սննդի մնացորդներով։
