ԵՐԵՎԱՆ, 29 մայիսի — Sputnik. ՀՀ վարչապետ Նիկոլ Փաշինյանի ղազախստանյան այցի օրակարգում ոչինչ չի փոխվել, բոլոր նախատեսված հանդիպումները կայացել և կայանում են: «Արմենպրեսին» այս մասին ասել է վարչապետի խոսնակ Վլադիմիր Կարապետյանը՝ անդրադառնալով տարածված տեղեկություններին, թե ՀՀ վարչապետն ընդհատելու է Ղազախստան կատարած աշխատանքային այցը և վերադառնում է Հայաստան:
«Նման բան չկա: Օրակարգով նախատեսված բոլոր հանդիպումները կայացել են և ընթացքի մեջ են: Այս պահին ընթանում է Նիկոլ Փաշինյանի և Ղազախստանում ապրող հայ գործարարների հանդիպումը: Քննարկվում են տարբեր ներդրումային ծագրեր, գործարար ակտիվության հետ կապված հարցեր»,- ասել է Կարապետյանը:
Կարապետյանը հայտնել է, որ նիստից հետո Փաշինյանը մասնակցել է պաշտոնական ճաշին։
Նախատեսվում է նաև ՀՀ վարչապետի հանդիպումը գործարարների հետ` Ղազախստանում ՀՀ դեսպանատանը։
Մամուլում տեղեկություններ էին տարածվել, որ Նիկոլ Փաշինյանը ԵԱՏՄ բարձրագույն խորհրդի նիստից հետո որոշել է չմասնակցել օրակարգով նախատեսված պաշտոնական ճաշին ու Ղազախստանում ՀՀ դեսպանատանը նախանշված գործարարների հետ հանդիպմանը։
Հիշեցնենք` Ղազախստանի մայրաքաղաք Նուր-Սուլթանում անցկացվել է ԵԱՏՄ գործունեության առաջին հնգամյակին նվիրված ԵԱՏՄ բարձրագույն խորհրդի նիստը։
ԵԱՏՄ-ն Մաքսային միության և ընդհանուր տնտեսական տարածքի հիման վրա ստեղծված ինտեգրացիոն տնտեսական միություն է, գործում է 2015 թ. հունվարի 1-ից: ԵԱՏՄ-ի անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը:
