ԵՐԵՎԱՆ, 29 մայիսի — Sputnik. Հոգեբուժարան տեղավորելու և պահելու հետ կապված՝ երեխաների և անգործունակ ճանաչված չափահասների կարծիքը հաշվի չի առնվում: Հայտնում է Մարդու իրավունքների պաշտպան Արման Թաթոյանը` հայտնելով, որ այս խնդրով դիմել է Սահմանադրական դատարան։
«Բանն այն է, որ ՀՀ գործող օրենսդրությամբ անձի օրինական ներկայացուցչի համաձայնությունն արդեն իսկ համարվում է բավարար պայման երեխաների և անգործունակ չափահասների հոգեբուժական օգնության, այդ թվում՝ հոգեբուժական հիվանդանոցում տեղավորելու համար»,– հայտնում է Թաթոյանը` հավելելով, որ օրենսդրական թերի կարգավորումների պատճառով հաճախակի են այն դեպքերը, երբ հոգեբուժարանում կամավոր բուժվող են համարվում այն անձինք, ում փոխարեն համաձայնություն են տվել նրանց օրինական ներկայացուցիչները։
Ըստ Թաթոյանի այդ մարդիկ փաստացի հոգեբուժարանում պահվում և բուժվում են իրենց կամքին հակառակ` զրկվելով նաև դատարանում հարկադիր բուժման հարցը բարձրացնելու հնարավորությունից։
Սահմանադրական դատարանին ուղղված դիմումի հիմքում ՄԻՊ–ը ներկայացրել է հոգեբուժարաններում մշտադիտարկման ու այցերի ընթացքում արձանագրված խնդիրները, ՄԻՊ գրասենյակին հասցեագրված անհատական բողոքները, միջազգային փորձը։
