ԵՐԵՎԱՆ, 29 մայիսի — Sputnik. Բաղրամյան պողոտան փակած բուքմեյքերական գրասենյակների աշխատակիցների խումբը գնացել է հանդիպելու պատգամավորների հետ։ Նրանք համաձայն են բանակցել գործադիր իշխանության ցանկացած ներկայացուցչի հետ, բացի «Իմ քայլը» դաշինքի պատգամավոր և փոխխոսնակ Ալեն Սիմոնյանից։
Ավելի վաղ ԱԺ տնտեսական հարցերի մշտական հանձնաժողովը հավանություն էր տվել վիճակախաղերի և մոլախաղերի կազմակերպման, խաղային ավտոմատների և տոտալիզատորների շահագործման պայմանների խստացման մասին օրինագծին։ Խաղատները 1.5 տարվա ընթացքում պետք է տեղափոխվեն Ծաղկաձոր, Սևան, Ջերմուկ և Մեղրի, իսկ խաղային ավտոմատները օրենքն ընդունելուց հետո 10-օրյա ժամկետում պետք է վերացվեն։
«Ալեն Սիմոնյանի հետ խոսելու բան չունենք։ Այն, ինչ հնարավոր էր, մենք արդեն քննարկել ենք», – հայտարարեց բուքմեյքերական ընկերություններից մեկի տնօրեն Սարգիս Միքայելյանը։
Բուքմեյքերական գրասենյակների ներկայացուցիչները հայտարարեցին, որ ճանապարհը փակ կլինի այնքան ժամանակ, մինչև բանակցող խումբն իրենց համար լավ նորություններով չվերադառնա։
Բաղրամյան պողոտայի և մասամբ Դեմիրճյանի փողոցի երթևեկությունը կաթվածահար է եղել։
Հիշեցնենք, որ կառավարությունը ևս հավանություն էր տվել վիճակախաղերի կազմակերպման պայմանների խստացման մասին նախագծին։ Օրինագիծը մշակվել է մոլախաղերի դեմ պայքարի շրջանակում։ Նրանց առաջարկվում է տարիքային շեմ սահմանել, սահմանափակել այն անձանց մասնակցությունը, որոնք անգործունակ են ճանաչվել։
Գործադիր մարմինը խաղերի մասնակիցների շահերի պաշտպանության համար նաև ֆինանսական երաշխիքներ կպահանջի։ Կառավարությունը նպատակահարմար է համարում երաշխիքը սահմանել պետտուրքի չափով, այսինքն` 500 մլն դրամ։
