Արցախն արդեն պատրաստ է ու սպասում է միջոցառման մասնակիցներին ու ֆուտբոլի երկրպագուներին։ Դա երևում է նաև այն բանից, թե ինչ ստեղծագործական նախանձախնդրություն է դրսևորվել մրցաշարի պաշտոնական երգի ու տեսահոլովակի հարցերում: Անկեղծ ասած, նման երգ ու ընդգրկուն, Արցախի նկարագիրը, մանրամասնություններով հանդերձ արտացոլող, բայցև միաժամանակ այդ ամենը ֆուտբոլին ու կոնկրետ մրցաշարին շաղկապող տեսահոլովակ անգամ ճանաչված երկրների ոչ բոլոր ԵՎՐՈ-առաջնությունների համար են ստեղծվում:
Հատկանշական է, որ մրցումներն անցկացվելու են ոչ միայն Ստեփանակերտում, այլև Արցախի երեք այլ քաղաքներում: Գավաթի խաղարկության կազմկոմիտեն հավաստիացնում է, որ ինչպես Ստեփանակերտը, այնպես էլ մյուս երեք քաղաքներն ու մրցավայրերը լիովին պատրաստ են «Conifa-Artsakh» («Կոնիֆա-Արցախ») մրցաշարին: Նշենք, որ մրցաշարի եզրափակիչը տեղի է ունենալու հունիսի 9-ին:
Իսկ ինչ վերաբերում է «ավելի մեծ» ֆուտբոլին, ապա մեկնումեկը երևի ՈՒԵՖԱ-ին կհուշի, որ եվրագավաթային եզրափակիչները արժե անցկացնել այն երկրում, որտեղ սիրում են ֆուտբոլ և հյուրընկալ են` ի տարբերություն, օրինակ, հարևանությամբ գտնվող երկրի:
