ԵՐԵՎԱՆ, 28 մայիսի –Sputnik. ԵԱՏՄ շրջանակում բովանդակային հարցերի շուրջ մշտապես վեճեր են առաջանում, եղել են վեճեր նաև Երևանում` միջկառավարական խորհրդի աշխատանքի ժամանակ։ Այս մասին այսօր ասել է ՌԴ վարչապետ Դմիտրի Մեդվեդևը «Россия 24»–ին տված հարցազրույցի ժամանակ։
«Վեճերը միշտ կան, դա նորմալ է։ Վերջին մեր միջոցառման ժամանակ, որը անցկացվել է Հայաստանում, մենք բավական երկար բանավիճում էինք և՛ բովանդակային հարցերի, և՛ երկկողմանի շփումների շուրջ», – ասել է Մեդվեդևը։
Ռուսաստանի վարչապետը հույս է հայտնել, որ ապագայում երկրների միջև վիճահարույց հարցերը կկարողանա լուծել ԵԱՏՄ դատարանը։
«Ես ընդհանրապես կողմ եմ դատական համակարգի համընդհանուր կիրառմանը։ Մի շարք դեպքերում, եթե համաձայնության գալ չի հաջողվում կամ դիրքորոշումներն անհամատեղելի են, կարելի է դիմել իրավաբանական մարմնին, այսինքն` դատարան և ասել` լուծիր մեր վեճը», – նշել է Մեդվեդևը։
Ընդ որում, ըստ նրա, դատարանի որոշումը հեղինակավոր կլինի միայն այն դեպքում, եթե այն անթերի, առանց որևէ մեկնաբանությունների կատարեն բոլոր կողմերը։ Դատարանն այդ առումով պետք է բարձրագույն ատյան լինի։
«Հույս ունեմ, որ նաև մեր ինտեգրացիոն միության դատարանը կոնկրետ հեռանկարում հեղինակության նման մակարդակի կհասնի», – նշել է Մեդվեդևը։
Նա նաև հնարավոր համարեց, որ Միությունը ապագայում կարող է ընդլայնվել, քանի որ այն բաց է, և արդեն դիտորդներ կան։
ԵԱՏՄ–ն Մեդվեդևն անվանեց «պատմական առումով մոտ պետությունների» ինտեգրման ձև, որը պետք է նպաստի նրանց ժողովուրդների կենսամակարդակի բարձրացմանը։
