ԵՐԵՎԱՆ, 27 մայիսի — Sputnik. Համաշխարհային օպերայի աստղ` Ռուսաստանի վաստակավոր արտիստ Վերոնիկա Ջիոևան վստահ է, որ հայրերն առանձնահատուկ երաժշտական կոդ ունեն, այդ պատճառով աշխարհի լավագույն երգիչների շարքում բազում հայեր կան։ Այս մասին նա Երևանում ասաց լրագրողների հետ այսօր՝ մայիսի 27-ին կայացած հանդիպման ժամանակ։
Աշխարհի լավագույն բեմերը գրաված օպերային դիվան հունիսի 24–ին ելույթ կունենա դիրիժոր Էդուարդ Թոփչյանի ղեկավարած Հայաստանի ազգային ֆիլհարմոնիկ նվագախմբի հետ։ Երգչուհին Երևան է ժամանել առաջիկա համերգի մանրամասները քննարկելու։
«Հուզվում եմ նման տաղանդավոր ժողովրդի դիմաց երգելուց։ Ինձ դեռ մի քանի տարի առաջ էին ուզում Հայաստան հրավիրել, բայց այն ժամանակ չստացվեց։ Կարծում եմ` սա ճակատագիր է։ Անչափ ուրախ եմ, որ երգելու եմ այս երկրում, այս մեծ ժողովրդի համար», – ասաց Ջոիևան։
Դիվան խոստովանեց, որ միշտ հիացել է հայ ժողովրդով, ու նրա սիրելի երաժիշտները հայեր են։ Ջիոևան մտերիմ է եղել խորհրդային օպերային երգչուհի Մարիա Գուլեգինայի (հորական ազգանունը` Մեյթարջյան) հետ։ Նա ասաց, որ Գուլեգինան հաճախ էր պատմում Հայաստանի մասին, խոստովանելով, որ սիրում է իր ժողովրդին։
Երգչուհին իր կյանքում անընդհատ հայերի է հանդիպել ու վստահ է, որ ամենալավ երգիչները հայերն են։
Նա կատակում է, որ նույնպես մի քիչ հայ է, քանի որ բոլորը, չգիտես ինչու, հենց այդպես են մտածում։
«Բոլոր մարդիկ, որոնց հետ աշխատել եմ, անվանի, զարմանալիորեն տաղանդավոր երաժիշտներ են։ Ինչ–որ հատուկ կոդ ունե՞ք, որ այդպիսինն եք ծնվում», – հռետորական հարց է տալիս Ջիոևան։
Երևանը երգչուհու սրտով է, նա համեմատում է այն իր հայրենիքի հետ։ Նա Հայաստանը Օսեթիայի պես ջերմ ու հյուրընկալ է համարում։ Դիվան շատ է հավանել տեղական ուտելիքը։
Ինչ վերաբերում է առաջիկա համերգին` Ջիոևան ասաց, որ հանդիսատեսին գեղեցիկ ծրագիր է սպասում` Մոցարտից մինչև Վերդի ու Պուչինի։ Մաեստրո Թոփչյանը նույնպես տպավորել է նրան։ Երգչուհին ընդգծեց, որ նա լավ երաժշտական ճաշակ ունի, ու «նա ձայներից հասկացող մարդ է»։
Ջիոևան խոստովանեց, որ համերգների ժամանակ անում է առավելագույնը և ուժերի ու ադրենալինի ներհոսք է զգում։
Հարցին` ինչպես է նրան հաջողվում վերականգնել ձայնը, Ջիոևան նշեց, որ ամենակարևորը լավ քնելն ու հանգստանալն է, թեև վերջերս դա դժվար է ստացվում։
«Երգիչը պետք է հանգստանա, չնյարդայնանա, խնայի ձայնը։ Չեմ կարող ասել, որ ես այդպիսի կյանք եմ վարում։ Առավոտյան արթնանում եմ, ինձ պետք չէ ձայնը բացել, այնպիսի տպավորություն է, որ ձայնս միշտ աշխատանքային ռեժիմում է։ Իմ համերգաշրջանը չի սկսվում ու չի ավարտվում», – խոստովանեց երգչուհին։
Այս ամռան ժամանակացույցը նույնպես հագեցած է. Ջիոևան ելույթ ունենալու Չեխիայում, Իտալիայում, Գերմանիայում։
Օպերային երգչուհի Վերոնիկա Ջիոևան ծնվել է 1979 թվականին Հարավային Օսեթիայում։ Հյուսիսային ու Հարավային Օսեթիայի ժողովրդական արտիստ է։ 2006 թվականին ընդունվել է Նովոռոսիյսկի օպերայի և բալետի թատրոն։
2011 թվականին նա մասնակցել է «Մեծ օպերա» օպերային երգիչների համառուսական հեռուստամրցույթին ու առաջին տեղն է զբաղեցրել։ 2012 թվականին եղել է Մեծ թատրոնի հրավիրված մենակատարը։
