ԵՐԵՎԱՆ, 25 մայիսի — Sputnik. ՀՀ բնապահպանության նախարարությունն արձագանքել է բնապահպանության նախկին փոխնախարար Այսեր Ղազարյանի ասուլիսին, որը մայիսի 24-ին կայացել էր Sputnik Արմենիա մամուլի կենտրոնում ։
«Բնապահպանական հիմնահարցերը, որոնց մեջ թերանալու համար վերջինս մեղադրում է նախարարությանը, իր անմիջական համակարգման ոլորտում են եղել, և վերջինս անձամբ էր պատասխանատու դրանց լուծման համար»,– նշված է հաղորդագրության մեջ։
Նախարարությունը նշում է, որ անտառային ոլորտում աշխատանքների պատասխանատուն Այսեր Ղազարյանն է եղել, և աշխատանքների չկատարումը կամ թերի կատարումը նախկին փոխնախարարը պատճառաբանել է՝ ոլորտում միայն իրեն հայտնի կոռուպցիոն ռիսկերով, սակայն խուսափել է որևէ առարկայական, անվանական գործողություն իրականացնելուց և հասցեական փաստ չի ներկայացրել իրավապահ մարմիններին։
Ղազարյանը ասուլիսի ժամանակ հայտնել էր, որ Բնապահպանության նախարարությունում չեն ցանկացել բարձրաձայնել նախկին տարիներին Սևանա լճի ափամերձ տարածքների մաքրման, պահածոյացված սիգի, «Սևանի իշխան» ՓԲԸ-ի վերաբերյալ տեղեկությունները, ինչն, ըստ նախարարության, չի համապատասխանում իրականությանը։
«Ասվածը հիմնավորելու համար նախարարությունը հայտնում է, որ 25․12․2018թ․ N 12900 գրությամբ Բնապահպանության նախարարությունը դիմել է ՀՀ գլխավոր դատախազություն՝ Սևանա լճի ջրածածկ հատվածների մաքրման նախկինում արված աշխատանքներում հայտնաբերված հնարավոր կոռուպցիոն մեխանիզմների առկայությունը քննելու առաջարկով։ 26․02․2019թ․ N 4085 և 25․03․2019 N 40142 գրություններով նախարարությունը դիմել է Պետական եկամուտների կոմիտեին՝ սիգի պահածոների արտադրության և արտահանման հանգամանքները պարզելու առաջարկով։ Իսկ 20․05․2019թ N 40414 գրությամբ դիմել է Վարչապետի աշխատակազմի անվտանգության խորհրդի գրասենյակ՝ Սևանա լճի էկոհամակարգերի վրա բացասական ազդեցություն թողնող գործոնների թվում ներկայացնելով նաև «Սևանի իշխան» ՓԲԸ-ի գործունեությունը»,– նշել է գերատեսչությունը։
Նախարարությունը նաև հայտնում է, որ իրականությանը չի համապատասխանում Այսեր Ղազարյանի վկայակոչած փաստը, թե նախարարությունը ոչ մի քայլ չի իրականացրել անտառապատվածության թիվն իջեցնելու համար։
«Նախ նշենք, որ տվյալ թիվը ամրագրված է 2015թ. սեպտեմբերի 10-ի N 41-5 արձանագրային որոշմամբ (4 տարի առաջ) ընդունված INDC փաստաթղթում։ Խնդրահարույց համարելով փաստաթուղթը, ինչպես նաև դրանում ներառված ցուցանիշները (այդ թվում՝ նախկին փոխնախարարի կողմից վկայակոչված թիվը), նախարարությունը նախաձեռնել է փաստաթղթի լրամշակում, իսկ վերջնական տարբերակի ներկայացման համար սահմանված ժամկետը «2018» թվականից փոխարինվել է «2020» թվականով (վերջնական տարբերակի ներկայացումից հետո միայն ՀՀ-ն կստանձնի կոնվենցիայի ներքո իր պարտավորությունները)։ Ի դեպ, թվի արդիականացման հանձնարարությունը նույնպես տրված էր Այսեր Ղազարյանին, սակայն այս դեպքում ևս նա չի կատարել իր պարտականությունները»,– նշել է նախարարությունը։
Հաղորդագրության մեջ նաև շեշտվում է, որ բնապահպանական բնույթի խախտումների վերաբերյալ տասնյակ այլ գրություններ են ուղարկվել և ուղարկվում իրավապահ մարմիններին, իսկ օրենսդրական բացերի դեպքում նախաձեռնում են անհրաժեշտ փոփոխությունները։
Հիշեցնենք` բնապահպանության նախարար Այսեր Ղազարյանը մայիսի 23-ին հայտնել էր, որ հրաժարականի դիմում է ներկայացրել։ Դրանից հետո նա Sputnik Արմենիա մամուլի կենտրոնում հրավիրված ասուլիսի ժամանակ ներկայացրել էր իր այդ քայլի հիմնական պատճառները`գերատեսչության ղեկավարությանը մեղադրելով ոլորտի խնդիրների լուծման համար ադեկվատ գործողություններ չձեռնարկելու մեջ
