ԵՐԵՎԱՆ, 24 մայիսի — Sputnik. Առողջապահության նախարարության «Դատաբժշկական գիտագործնական կենտրոնը» նոր սարքավորմամբ է վերազինվել։ Ինչպես հայտնում է առողջապահության նախարարությունը, նոր սարքավորումը հնարավորություն կտա, որ Հայաստանն ունենա միջազգային չափանիշներին համապատասխան դատագենետիկական փորձաքննությունների իրականացման կենտրոն։
Պաշտպանության նախարարության հետ համագործակցության արդյունքում հնարավոր կլինի իրականացնել Ղարաբաղյան հակամարտության ընթացքում անհետ կորածների, գերիների և պատանդների հայտնաբերման ծրագիր, որի շրջանակում միջազգային Կարմիր խաչի աջակցությամբ անհետ կորածների հարազատներից արդեն ստացվել են կենսաբանական ծագման նմուշներ։
«Հաջորդ նախագիծը Հայաստանի Հանրապետության ոստիկանությունում Ինտերպոլի միջազգային կազմակերպության որոնողական բազայի ծրագրի ներդրումն է։ Ոստիկանության մասին օրենքում փոփոխություն և լրացում կատարելու արդյունքում կենսաբանական ծագում ունեցող հետքերով ծանր և առանձնապես ծանր, ինչպես նաև սեռական ազատության և անձեռնմխելիության դեմ ուղղված հանցագործություն կատարած անձանց հայտնաբերելու նպատակով ԴՆԹ բնութագրերը, որոնք հայտնաբերվում են դատագենետիկական փորձաքննության արդյունքում պետք է տրամադրվեն ոստիկանությանը հատուկ կապի միջոցով, որն արդեն իսկ հաստատված է ԱՆ Դատաբժշկական կենտրոնի և ոստիկանության միջև»- ընդգծել է Արսեն Թորոսյանը:
Նորացված կենտրոնի բացմանն այսօր ներկա են եղել առողջապահության նախարար Արսեն Թորոսյանը, պաշտպանության նախարար Դավիթ Տոնոյանը, քննչական կոմիտեի նախագահ Հայկ Գրիգորյանը և այլ պաշտոնյաներ:
