ԵՐԵՎԱՆ, 20 մայիսի — Sputnik, Արմենուհի Մխոյան. Նիկոլ Փաշինյանի կոչին հետևող քաղաքացիները հավաքվել են Շիրակի մարզի ընդհանուր իրավասության առաջին ատյանի դատարանի մուտքի մոտ: Նրանց շարքերում են նաև ԱԺ պատգամավորներ Կարեն Սարուխանյանը և Նազելի Բաղդասարյանը:
Չնայած վաղ առավոտից էին շիրակցիները հավաքվել դատարանի մուտքի մոտ՝ նպատակ ունենալով խոչընդոտել աշխատակիցների մուտքը դատարան, սակայն, պարզվում է վերջիններս շատ ավելի վաղ էին աշխատանքի եկել` 7:40–ին և շարունակում էին դեպքերին հետևել իրենց սենյակների պատուհաններից:
«Հավաքվել ենք մեր ընդվզումը հայտնելու իշխանության մի թևի անգործունակությանը: Դատական համակարգն այսօր չի սպասարկում ՀՀ քաղաքացիների շահերը: Իշխանությունը եռաթև է և նրանցից յուրաքանչյուրը պետք հավասարաչափ ծառայի ժողովրդին, և ժողովուրդն էլ ցանկացած ժամանակ կարող է միջամտել թևերի անգործունակության լուծմանը: Դատական համակարգը անգործության մատնվելով` պարալիզացվում է ամբողջ կառավարման համակարգը և, հետևաբար, մենք մեր ընդվզումն ենք հայտնում այստեղ»,-նշեց հավաքվածներից Կարեն Պետրոսյանը՝ փաստելով, որ այս քայլը նույնիսկ ուշացած է:
Բողոքավորները կշարունակեն մնալ դատարանի մուտքի մոտ մինչև վարչապետի հայտարարությունը:
