ԵՐԵՎԱՆ, 20 մայիսի — Sputnik. ՀՀ գլխավոր դատախազը հանձնարարել է այսօր դատարանների մուտքերն ու ելքերն արգեփակելուն ուղղված գործողությունների ընթացքում կատարված առերևույթ հանցագործության վերաբերյալ ներկայացված բոլոր հաղորդումներն ու ահազանգերը ուղարկել ՀՀ գլխավոր դատախազություն։
Այս մասին իր Facebook-յան էջում հայտնում է ՀՀ գլխավոր դատախազի խորհրդական Գոռ Աբրահամյանը:
Նշվում է նաև, որ հաղորդումները քրեադատավարական կարգով համակողմանի ստուգելու և իրավական գնահատականի արժանացնելու նպատակով Դատախազությունը դրանք կուղարկի ՀՀ հատուկ քննչական ծառայություն։
Հիշեցնենք` այսօր առավոտից ՀՀ վարչապետ Նիկոլ Փաշինյանի կոչով դատարանների մոտ իրականացված բողոքի ակցիաներից մի քանիսի ընթացքում գրանցվել էին միջադեպեր։ Մասնավորապես`քաղաքացիների արգելքը շրջանցելու մի շարք փորձեր ավարտվել էին ուժի կիրառմամբ ու քաշքշուկով։
