ԵՐԵՎԱՆ, 19 մայիսի — Sputnik. Ալ. Սպենդիարյանի անվան օպերայի և բալետի ազգային ակադեմիական թատրոնում ռումբի մասին ահազանգը կեղծ էր։ Այս մասին Sputnik Արմենիայի հետ զրույցում հայտնեցին ՀՀ արտակարգ իրավիճակների նախարարությունից։
«Քիչ առաջ ԱԻՆ-ն ավարտել է տարածքում որոնողական աշխատանքները և ոչինչ չենք հայտնաբերել», - ասացին ԱԻՆ-ից։
Օպերայի թատրոնում այսօր «Գայանե» բեմադրությունն է նախատեսված և շատերը սոցցանցերում մտահոգություն էին հայտնել, թե արդյո՞ք այն չի հետաձգվի։
Թատրոնի տնօրենի ժամանակավոր պաշտոնակատար Կարինե Կիրակոսյանը մեզ հայտնեց, որ ներկայացումը չի հետաձգվի։
«Վերադառնում ենք մեր բնականոն աշխատանքին, և երեկոյան սպասում հանդիսատեսին»,–ասաց նա։
Հիշեցնենք, որ ԱԻՆ–ն 13:03-ին ահազանգ էր ստացել, որ օպերայի թատրոնի շենքում ռումբ է տեղադրված։
