ԵՐԵՎԱՆ, 19 մայիսի — Sputnik. Ազատության հրապարակում քիչ առաջ մեկնարկել է Ռոբերտ Քոչարյանի ազատ արձակման դեմ բողոքի ակցիան։
Բողոքի ակցիա իրականացնողները հայտարարեցին, որ անցումային արդարադատություն են պահանջում:
Ազատության հրապարակում նրանք «դմփ-դմփ-հու» արեցին։
Հիշեցնենք, որ ՀՀ 2-րդ նախագահին կալանքից ազատելու երաշխավորությամբ էին հանդես եկել Արցախի նախագահ Բակո Սահակյանը և նախկին նախագահ Արկադի Ղուկասյանը: Երեկ դատարանը բավարարեց Արցախի նախագահների միջնորդությունը և Քոչարյանն ազատ արձակվեց։
Հիշեցնենք նաև, որ երեկ միջադեպ է տեղի ունեցել Ազատության հրապարակում ՀՀ երկրորդ նախագահ Ռոբերտ Քոչարյանին կալանքից ազատելու դատարանի որոշման դեմ բողոքող ցուցարարների և իր մանկահասակ թոռների հետ հրապարակում զբոսնող ՀՅԴ-ական Հրանտ Մարգարյանի միջև:
Ակցիայի մասնակիցները, Ազատության հրապարակում երեխաներին զբոսանքի բերած Հրանտ Մարգարյանին տեսնելով` սկսել են վանկարկել «Ամոթ» և «Դավաճան», հետո փորձել են մոտենալ նրան, քաշքշել: Ոստիկաններին հաջողվել է հանդարտեցնել ակցիայի մասնակիցներին:
