ԵՐԵՎԱՆ, 17 մայիսի — Sputnik, Արմենուհի Մխոյան. Շիրակում աշխատանք փնտրող մանկավարժներն այսուհետ ստիպված չեն լինի այս կամ այն դպրոցի տնօրենի դուռը թակել, կամ թափուր աշխատատեղի մասին տեղեկության համար ծանոթ-բարեկամներին անհանգստացնել: Շիրակի մարզպետարանի պատվերով Գյումրիում գործող «Աննանիկս» ընկերությունը ստեղծել է teacher.am կայքը, որը նպատակ ունի տեղեկատվական աջակցություն ցուցաբերել հանրակրթության ոլորտում աշխատանք փնտրող անձանց։ Նոր համակարգը հնարավորություն է տալու աշխատանք փնտրող ուսուցիչներին առավել հեշտությամբ ստանալ տեղեկատվություն թափուր աշխատատեղերի մասին։
![Շիրակը կրկին առաջինն է. թափուր աշխատատեղերի պարզ կայքը կօգնի բարդ իրավիճակում գտնվողներին Շիրակը կրկին առաջինն է. թափուր աշխատատեղերի պարզ կայքը կօգնի բարդ իրավիճակում գտնվողներին - Sputnik Արմենիա](https://cdn.am.sputniknews.ru/img/1865/17/18651717_0:0:1600:1200_600x0_80_0_0_97c48b8e588e4ebe234d39e265f2371f.jpg)
Կայքը շատ պարզ ու հասարակ է: Ցանկացած մարդ մուտք է գործում կայք, ծանոթանում կայքի գործունեությանը, գրանցվում: Սեղմելով հաստիքների կոճակը ընտրում նախընտրելի հաստիքը, ապա համայնքն ու հաստատում: Բազայում թափուր հաստիքի առկայության դեպքում գրանցվողը միաժամանակ՝ մարզպետարանի կրթության վարչության հետ միասին ստանում է տեղեկություն:
Համակարգը ամբողջովին նոր է՝ մեկ օր է ինչ ակտիվ է: Կայքի աշխատանքին առաջինը լրագրողները ծանոթացան:
«Սա մի համակարգ է, որտեղ գրանցվելով աշխատանք փնտրող մանկավարժը հնարավորություն կստանա առանց միջնորդի տեղեկատվություն ստանալ իրեն հետաքրքրող համայնքում, դպրոցում, իրեն հետաքրքրող թափուր աշխատատեղի մասին: Այս ամենն արվել է գործընթացն առավել թափանցիկ դարձնելու համար»,-ներկայացնելով կայքը նշեց Շիրակի մարզպետ Տիգրան Պետրոսյանը՝ կարևորելով այն հանգամանքը, որ սա նախ թափանցիկությունն է ապահովում, ապա կադրային մրցակցային դաշտ, ինչպես նաև հնարավորություն է տալիս աշխատանք փնտրողին տանը՝ իր բազմոցին նստած, տեղեկանալու գործընթացին:
![Շիրակը կրկին առաջինն է. թափուր աշխատատեղերի պարզ կայքը կօգնի բարդ իրավիճակում գտնվողներին Շիրակը կրկին առաջինն է. թափուր աշխատատեղերի պարզ կայքը կօգնի բարդ իրավիճակում գտնվողներին - Sputnik Արմենիա](https://cdn.am.sputniknews.ru/img/1865/17/18651700_0:0:2048:1536_600x0_80_0_0_2af7ce9603e583960889fca00b83fcd9.jpg)
Sputnik Արմենիայի այն հարցին թե արդյոք նման կայք գործում է մյուս մարզերում մարզպետը նշեց «համենայն դեպս ես դրա մասին չգիտեմ»,-խոստանալով ցանկության դեպքում այս փորձը կիսել մյուսների հետ:
Շիրակի մարզպետը հավելեց, որ այսօրինակ համակարգ նախատեսվում է ստեղծել նաև առողջապահության բնագավառում առկա թափուր աշխատատեղերն առավել հրապարակային դարձնելու նպատակով: