ԵՐԵՎԱՆ, 17 մայիսի — Sputnik. Մարտի 1-ի գործով հարցաքննվել է նաև ՀՀ նախկին ոստիկանապետ Ալիկ Սարգսյանը: Լուրը «Հայկական ժամանակի» հետ զրույցում հաստատել է Ռոբերտ Քոչարյանի պաշտպան Հայկ Ալումյանը:
«Ալիկ Սարգսյանը սույն գործի շրջանակում վկայի կարգավիճակ ունի: Վկայի կարգավիճակով ավելի վաղ հարցաքննվել են Սերժ Սարգսյանը, Լևոն-Տեր Պետրոսյանը, Հայկ Հարությունյանը և այլք»,–գրում է թերթը:
Բանն այն է, որ ըստ ՀՔԾ-ի՝ մարտի 1-ին և 2-ին Երևան քաղաքում տեղի ունեցած իրադարձությունների ժամանակ ՀՀ ոստիկանության անօրինական գործողությունները քողարկելու, այդ իրադարձություններին զինված ուժերի մասնակցության հանգամանքները թաքցնելու նպատակով ՀՀ արդարադատության նախարարի տեղակալ, իսկ 2008 թվականի հուլիսի 2-ից՝ ՀՀ նախագահի օգնականի պաշտոնին նշանակված Գևորգ Կոստանյանի և ՀՀ նախագահի օգնական, իսկ 2008 թվականի հուլիսի 2-ից ՀՀ ոստիկանության պետի տեղակալի պաշտոնում նշանակված, ներկայումս՝ հանգուցյալ Գևորգ Մհերյանի հանձնարարությամբ ՀՀ ոստիկանության մի խումբ բարձրաստիճան պաշտոնական անձինք, այդ թվում՝ ՀՀ ոստիկանապետ Հայկ Հարությունյանը, վերջինիս տեղակալ Ալեքսանդր Աֆյանը, ինչպես նաև՝ ՀՀ ոստիկանության քրեական հետախուզության վարչության պետ Հայկ Միլիտոնյանը, վերջինիս տեղակալ Հովհաննես Թամամյանը և ոստիկանության զորքերի մի խումբ ծառայողներ, 2008թ. մայիսի 29-ին ՀՀ ոստիկանության պետ նշանակված Ալիկ Սարգսյանը հետին ամսաթվով ստորագրել են կեղծ պաշտոնական փաստաթղթեր, որոնք տրամադրել են մարտի 1-ին և 2-ին Երևան քաղաքում տեղի ունեցած իրադարձություններն ուսումնասիրող ՀՀ ԱԺ ժամանակավոր հանձնաժողովին և Փորձագետների փաստահավաք խմբին։
