ԵՐԵՎԱՆ, 17 մայիսի — Sputnik, Նանա Մարտիրոսյան. Միայն մեկ օր` մայիսի 18-ին, հայ թատերասեր հանդիսատեսը կկարղանա տեսնել «ակադեմիական» բեմադրության պատրիարք Լև Դոդինի լավագույն ներկայացումներից մեկը` «Բալենու այգին», ընդ որում ոչ սովորական ձևաչափով՝ «KinoPark» կինոթատրոնում։ Սանկտ Պետերբուրգի փոքր դրամատիկական թատրոնի մարգարիտը կցուցադրվի «Ոսկե դիմակը կինոյում» նախագծի շրջանակում։
«Մենք երեք ընտրություն ունեինք. խորհրդակցելով՝ որոշեցինք ցուցադրել հենց ռուսական դասական ստեղծագործությունը` ներկայացում Անտոն Չեխովի պիեսի հիման վրա, քանի որ դա ավելի մոտ է հայ հանդիսատեսին։ Բայց սա միակ ներկայացումը չէ։ Ապագայի բազմաթիվ ծրագրեր կան, մտադիր ենք շուկա մտնել և զարգացնել կինոյում թատրոնի ուղղությունը», – Sputnik Արմենիայի թղթակցի հետ զրույցում ասաց «KinoPark»–ի տնօրեն Արեգ Դանիելյանը։
Սա վկայում է, որ հայ հանդիսատեսը մոտ է թատերական արվեստին, սակայն հանգամանքների բերումով չի կարողանում այցելել Լոնդոնի կամ Բրոդվեյի թատրոնը, մեծ գումարներ ծախսել, բայց հաճույքով ներկայացումներ է դիտում հարմարավետ դահլիճում, կարծում է Դանիելյանը։
«Այո, անկասկած, գոյություն ունի լայֆ էֆեկտ, և մենք արել ենք ամեն ինչ, առավելագույնս այն փոխանցելու համար։ Ավելին, մենք այնպիսի ձևաչափեր ենք բերելու, որոնք հետաքրքիր կլինեն և բում կդառնան. Շեքսպիր բացառիկ անգլերենով, Բրոդվեյի թատրոնի ներկայացումներ, օրինակ` «Կատուները»», – ասաց նա` անակնկալներ խոստանալով։
Դանիելյանը չբացառեց, որ շուտով կինոթատրոնում նաև հայկական թատրոնների ներկայացումների առցանց ցուցադրություններ կանցկացվեն։
