Վիգեն Հակոբյանի խոսքով` եթե Վահե Գրիգորյանը միակ իշխանահաճո թեկնածուն էր, և նախագահը նրան չի առաջադրել, ապա ինքնուրույն քայլ է արել, ինչը հասարակության մի մասը սպասում է նրանից։
«Ակնհայտ է` նախագահը քայլ է արել, որով ցանկացել է շեշտել, որ սահմանադրությամբ իրեն տրված լիազորությունների շրջանակում կարող է քայլեր անել, որոնք կարող են չհամընկել իշխող քաղաքական ուժի ցանկությունների կամ կարծիքների հետ»,-ասում է Հակոբյանը։
Ըստ քաղաքագետի` եթե Վահե Գրիգորյանի թեկնածությունը սկզբունքային նշանակություն ունի իշխանության համար, ապա նախագահի առաջադրած նոր թեկնածուն ևս նախորդի պես կմերժվի ԱԺ մեծամասնության կողմից։
Նշենք` «Ժողովուրդ» օրաթերթն այսօր գրել էր. «ՀՀ նախագահի և ԱԺ մեծամասնության միջև ևս մեկ դիմակայություն է սպասվում: Նախագահ Արմեն Սարգսյանը ՍԴ անդամի թափուր տեղի համար խորհրդարան է ներկայացրել ԵՊՀ իրավագիտության ֆակուլտետի պետության և իրավունքի տեսության ու պատմության ամբիոնի վարիչ, իրավաբանական գիտությունների դոկտոր, պրոֆեսոր Արթուր Վաղարշյանի թեկնածությունը: Ու սա այն դեպքում, երբ խորհրդարանական մեծամասնությունը ցանկանում է այդ պաշտոնին տեսնել միայն փաստաբան Վահե Գրիգորյանին՝ ՄԻԵԴ-ում «Մարտի 1»-ի գործով տուժածների ներկայացուցչին»:
ՀՀ Ազգային ժողովի նախագահ Արարատ Միրզոյան էլ այսօր հայտարարություն է տարածել Սահմանադրական դատարանի դատավորի առաջադրման և ընտրության անցկացման մասին:
«Հանրապետության նախագահը Սահմանադրական դատարանի դատավորի թափուր տեղի համար առաջադրել է Արթուր Վաղարշյանի թեկնածությունը»,– նշված է հայտարարության մեջ:
Սահմանադրական դատարանի դատավորի ընտրության հարցը կքննարկվի մայիսի 29-ին գումարվող Ազգային ժողովի հերթական նիստերի առաջին նիստում»:
