ԵՐԵՎԱՆ, 14 մայիսի — Sputnik. Հայաստանի վարչապետ Նիկոլ Փաշինյանն աշխատանքային այցով ժամանել է Պեկին։
Օդանավակայանում Հայաստանի պատվիրակությանը սպասում էր Պատվո պահակախումբը։Ազգային տարազներով երեխաները ծաղիկներ են նվիրել վարչապետ Նիկոլ Փաշինյանին և տիկին Աննա Հակոբյանին:
Փաշինյանին դիմավորել են Չինաստանի կոմունիստական կուսակցության կենտրոնական կոմիտեի քարոզչության փոխնախարար Գուո Վեյմինը, Հայաստանւմ Չինաստանի դեսպան Տիեն Էրլոնգը, երկրում հայկական դիվանագիտության ներկայացուցիչները։
Մայիսի 14-ի երեկոյան տեղի է ունենալու վարչապետ Նիկոլ Փաշինյանի և ՉԺՀ նախագահ Սի Ծինփինի հանդիպումը, Փաշինյանը կհանդիպի նաև վարչապետ Լի Կեցյանի հետ, ինչպես նաև կմասնակցի «Ասիական քաղաքակրթությունների երկխոսություն» համաժողովին, որտեղ ելույթ կունենա։
Բրյուսելից Չինաստան ուղևորված վարչապետին ուղեկցում է կինը` Աննա Հակոբյանը։ Պեկինում նրա պատվիրակությանը միացել է տրանսպորտի նախարար Հակոբ Արշակյանը։
