ԵՐԵՎԱՆ, 14 մայիսի — Sputnik. Հայ–վրացական սահմանին գտնվող «Վերին Լարս» հսկիչ անցակետի այլընտրանքային երթուղի կարող է դառնալ կոնտեյներային փոխադրումը։ Այսօր հրավիրված ասուլիսի ժամանակ այս մասին ասաց ԱԺ տարածաշրջանային և եվրասիական ինտեգրման հարցերի մշտական հանձնաժողովի նախագահի տեղակալ Արմեն Փամբուխչյանը։
«Այլընտրանքային երթուղի է ծովային ճանապարհը։ Մեր հետազոտությունների և հաշվարկների համաձայն` ավելի արդյունավետ է փոխադրումների կոնտեյներային ուղին, ոչ թե լաստանավայինը»,– նշեց նա։
Պատգամավորը պարզաբանեց, որ լաստանավային հաղորդակցությունն օգտագործվում է ոչ բոլոր ապրանքները տեղափոխելու համար։ Միաժամանակ, նոր լաստանավը կարժենա 10-15 միլիոն դոլար, իսկ հինը (1976թ–ի արտադրության), որն աշխատում է խափանումներով, արժե 2,2 միլիոն դոլար։
Ինչ վերաբերում է Աբխազիայի և Հարավային Օսեթիայի տարածքով բեռները Հայաստան առաքելու երթուղիներին, ապա Փամբուխչյանը կասկած հայտնեց դրանց գործարկման վերաբերյալ։ Նրա կարծիքով` քիչ հավանական է, որ այդ ուղիները գործարկվեն մոտ ապագայում քանի որ հարցը գտնվում է Ռուսաստանի և Վրաստանի հարաբերությունների կարգավորման քաղաքական հարթությունում։
Լարսի հետ կապված հարցը կարելի է լուծել` ընդլայնելով «Վերին Լարսի» անցակետի թողունակությունը։ Ի սկզբանե այն նախատեսված է եղել օրական 3 հազար մեքենա սպասարկելու համար, այսօր սպասարկում է հինգ անգամ ավելի` 10-185 հազար։ Դրանով են պայմանավորված խցանումները, ուշացումները։
Փամբուխչյանը «ծովային օրենսդրություն» ընդունելու կողմնակից է, ինչը թույլ կտա, որ Հայաստանը սեփական նավեր ունենա։ Պատգամավորի կարծիքով` նավերից մեկը կարող է բեռներ տեղափոխել Հայաստանի համար Փոթի նավահանգիստով։ Նախատեսվում է, որ առաջիկայում կմշակվի օրինագիծ։
