ԵՐԵՎԱՆ, 11 մայիսի — Sputnik. Վանաձորի թիվ 18 միջնակարգ դպրոցի տնօրենը «Գազպրոմ Արմենիա» ընկերությունում աշխատող իր փեսային 8 տարի շարունակ դպրոցի բյուջեից աշխատավարձեր է վճարել։
Այս տվյալները Ոստիկանության կոռուպցիոն հանցագործությունների դեմ պայքարի գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչությունը ստացել է ԱԱԾ-ից և պարզել, որ 2011թ սեպտեմբերի մեկից 2018թ սեպտեմբերի մեկն ընկած ժամանակահատվածում տնօրենն իր փեսային հրամանագրել է որպես դպրոցի տնտեսական գծով փոխտնօրեն, իսկ 2018 թ․ սեպտեմբերի 1-ից առ այսօր՝ հնոցապանների կարգադրիչ։
Բացի այդ, 2014թ հունվարի 1-ից 2018թ սեպտեմբերի 1-ը որպես տեխնոլոգիայի ուսուցիչ, իսկ 2016թ մայիսի 11-ից 2017թ փետրվարի 28-ը որպես դաստիարակ է հրամանագրել երկու այլ քաղաքացիների։
Այդ ընթացքում տնօրենը կազմել և իր ստորագրությամբ վավերացրել է աշխատավարձերի վճարման կեղծ տեղեկանքներ, որոնց միջոցով դպրոցի բյուջեից հափշտակել է 20 129 632 դրամ։
Փաստի առթիվ հարուցվել է քրեական գործ։
Կատարվում է նախաքննություն։
