Քաղտեխնոլոգ Արմեն Բադալյանը Sputnik Արմենիայի հետ զրույցում, մեկնաբանելով Ազգային ժողովի «Բարգավաճ Հայաստան» խմբակցության ղեկավար Գագիկ Ծառուկյանին վերագրվող ձեռնարկատիրական գործունեության մասին հարցը, այն կարծիքն է հայտնել, որ խնդիրն այդպիսի մեծ արձագանք առաջացրեց լրատվական դաշտում, քանի որ ներքաղաքական օրակարգում դատարկություն է։ Ըստ քաղտեխնոլոգի, հենց այդ ներքաղաքական դատարկությունը ծնում է մեկ-երկու օրվա կյանք ունեցող հարցեր, որոնք հասարակության կյանքում որևէ նշանակություն չունեն։
«Անկախ նրանից` կմնա Ծառուկյանը պատգամավոր, թե` վայր կդնի մանդատը, դրանից հասարակության կյանքում, մեծ իմաստով, որևէ փոփոխություն չի լինելու»,–կարծում է Բադալյանը։
Նրա խոսքով, Բարգավաճ Հայաստան» խմբակցության ղեկավարի մանդատը վայր դնելուց կամ չդնելուց ոչ ներդրումներն են ավելանալու կամ պակասելու, ոչ էլ աշխատավարձերն են ավելանալու։
«Ինչ-որ կուսակցություն, սեփական PR-ի համար մի հարց է դրել շրջանառության մեջ, որն օրեր անց մոռացության է մատնվելու»,-վստահ է Արմեն Բադալյանը։
Քաղտեխնոլոգը կարծում է, որ եթե կա իրավական խնդիր, ապա դրանով պետք է զբաղվի ՀՔԾ-ն։
«Այնպես չէ, որ այս հարցով բիզնեսն ու քաղաքականությունն իրարից տարանջատվում են»,-ասում է քաղտեխնոլոգը։
Արմեն Բադալյանը մատնացույց է անում Ազգային ժողովի իշխող «Իմ քայլը» խմբակցության անդամ պատգամավոր Արսեն Ջուլֆալակյանի մասին մամուլում տեղ գտած այն հրապարակումը, որտեղ Ջուլֆալակյանը ներկայացվում է որպես գործարար։
