ԵՐԵՎԱՆ, 7 մայիսի — Sputnik. Պատրաստ եմ մահից հետո իմ օրգանները տրամադրել մեկին, որը կունենա դրա կարիքը։ Այս մասին Sputnik Արմենիայի և «Հայկական ժամանակի» հետ զրույցում ասաց ՀՀ առողջապահության նախարար Արսեն Թորոսյանը։
Նշենք, որ առողջապահության նախարարությունը Հայաստանում նախատեսում է առաջիկայում դիակային փոխպատվաստում սկսել։
«Փոխպատվաստման օրենքը վաղուց կա, պարզապես որևէ բան չի արվել համակարգը Հայաստանում ներդնելու համար։ Այսինքն` մենք ոչինչ չենք հնարել, բայց գտնում ենք, որ մարդկանց փրկելու համար պետք է նաև դիակային փոխպատվաստում իրականացնել։ Սա, իսկապես, տասնյակ կյանքեր է փրկելու։ Վստահեցնում եմ` դիակային փոխպատվաստման հետ կապված անհանգստանալու որևէ առիթ չկա, և ինքս էլ պատրաստ եմ մահից հետո իմ օրգանները տրամադրել»,–ասաց նախարարը։
Նրա խոսքով` դիակային փոխպատվաստման ողջ գործընթացը խիստ կանոնակարգված է լինելու։ Բացի այդ, ըստ նրա, մարդիկ կարող են նաև հրաժարվել իրենց օրգանները տրամադրել, ինչն օրենքով է ամրագրված լինելու։
Սակայն մինչև դիակային փոխպատվաստմանն անցնելուն` դեռ մի շարք անելիքներ կան։ Թորոսյանը նշեց, որ նախ պետք է ռեեստր ստեղծեն, վերապատրաստեն այն ԲԿ–ների բժիշկներին, որտեղից պետք է վերցվեն այդ օրգանները, ինչպես նաև նրանց, որոնք պետք է փոխպատվաստումներ իրականացնեն։ «Դիակային փոխպատվաստման առնչությամբ հնչող «մտահոգությունների» մեծ մասը գալիս է նրանից, որ Հայաստանում որոշ մարդիկ ամեն հաջորդ օրն ապոկալիպսիս են կանխատեսում։ Իսկ ես հույս ունեմ, որ առաջիկա 1-2 տարվա ընթացքում մեզ կհաջողվի ծրագիրը կյանքի կոչել` նախապատրաստված ու ապահովելով դրա թափանցիկությունը»,–ասաց նա։
Նկատառմանը, թե քաղաքացիների մտահոգությունը հիմնականում կախված է անընդմեջ շրջանառվող լուրերից, որ մի շարք առաջատար երկրներում օրգանների վաճառքի մաֆիա կա և ինչպե՞ս է Հայաստանում վերահսկողությունը կազմակերպվելու` Թորոսյանն արձագանքեց, թե շատ երկրներում տարբեր բացասական երևույթներ կան, այլ հարց է` մենք ինչ արդյունք ենք ուզում ունենալ և ինչի հասնել. «Դիակային փոխպատվաստում իրականացվում է Բելառուսում, ՌԴ–ում, Արևմտյան Եվրոպայի երկրներում, ԱՄՆ–ում... Սովորաբար դիակային փոխպատվաստման համար օգտագործվում են դժբախտ պատահարների հետևանքով մահացած քաղաքացիների օրգանները, մասնավորապես` գլխուղեղի վնասվածք ստացած մարդկանց օրգանները, քանի որ նրանց այլ օրգանները վնասված չեն լինում»։
Նա նշեց նաև, որ դիակային փոխպատվաստման մեկնարկից սկսած` պետությունն, ամենակարևորը, պետք է ապահովի այդ պրոցեսի թափանցիկությունը։
Հիշեցնենք, որ ապրիլի 24–ին Հայաստանում առաջին անգամ կատարվել է լյարդի փոխպատվաստում: «Աստղիկ» բժշկական կենտրոնում վիրահատել են 56 տարեկան մի կնոջ, ում համար դոնոր է հանդիսացել 20-ամյա դուստրը: Հայ մասնագետներին վիրահատությունն իրականացնելու համար օգնել են Մոսկվայի Բուռնազյանի անվան պետական գիտական կենտրոնի մասնագետները։
