ԵՐԵՎԱՆ, 6 մայիսի — Sputnik. ԱԺ նախկին պատգամավոր, ԵԿՄ նախկին նախագահ Մանվել Գրիգորյանի պաշտպանական խումբը սպառված է համարում արդարադատությունը ներպետական ատյաններում և օրենքով սահմանված կարգով դիմելու է Մարդու իրավունքների եվրոպական դատարան։ Այս մասին այսօր լրագրողների հետ հանդիպման ժամանակ ասաց Գրիգորյանի փաստաբան Լևոն Բաղդասարյանը։
«Ավելին, վերջին դատական ակտը չենք սպառելու ներպետական ատյաններում և աղաղակող խախտումներով դիմելու ենք Եվրոպական դատարան», - հայտարարեց փաստաբանը։
Լևոն Բաղդասարյանի խոսքով` վարույթն իրականացնող մարմինները միջամտում են իր պաշտպանյալի վերաբերյալ գործի քննությանը։
«Մանվել Գրիգորյանին մեղադրանք է առաջադրվել նաև հարկային պարտավորություններից խուսափելու համար։ Բայց Քրեական օրենսգիրքը նաև պահանջում է՝ եթե անձը առերևույթ հարկային պարտավորությունները չկատարելու հիմքով փոխհատուցում է այդ պարտավորությունները, ուղղակի պարտավոր են գործը կարճել։ Դա իմպերատիվ պահանջ է։ Սակայն վարույթն իրականացնող մարմինն այդ գործն ուղարկել է դատարան»։
Այսպիսով, Բաղդասարյանը եզրակացրել է, որ Մանվել Գրիգորյանի վերաբերյալ քրեական գործով տեղի է ունենում ընտրովի արդարադատություն։
Ինչ վերաբերում է Գրիգորյանի խափանման միջոց կալանքին, որը վերացնելու համար պաշտպանական կողմի բազում միջնորդություններ մերժվել են դատարանների կողմից, փաստաբանն ասաց, որ մեղադրող կողմը հիմքեր չի ներկայացնում, թե ինչպես կարող է Մանվել Գրիգորյանը, կալանքից ազատվելով, խոչընդոտել քննությանը։
«Մեղադրող դատախազը հայտարարեց, որ Մանվել Գրիգորյանը, չգտնվելով կալանքի տակ, կարող է խոչընդոտել քննությանը։ Նա բերե՞ց գոնե մեկ օրինակ, որ այս ֆորմատով անձը կարող է խուսափել ու խոչընդոտել քննությանը», - հավելեց փաստաբանը։
Նշեք, որ նախկին պատգամավորն այժմ քաղաքացիական հիվանդանոցում է: Վատառողջ լինելու պատճառով նա չէր ներկայացել այսօրվա դատական նիստին։ Փոխարենը նիստին մասնակցում էր Գրիգորյանի կինը` նույն գործով ամբաստանյալ Նազիկ Ամիրյանը։
Հիշեցնենք՝ 2018թ.-ի հունիսի 16-ին կատարված խուզարկություններով, ԱԱԾ–ն Արմավիրի մարզի Արշալույս գյուղի Գրիգորյաններին պատկանող առանձնատներում հայտնաբերել էր 17 606 հատ տարբեր տրամաչափի փամփուշտ, 20 հատ «Փ-1» տեսակի ձեռքի բեկորային մարտական նռնակ, 20 «УЗРГМ-2» տեսակի մարտական պայթուցիչներ, 18 հատ կրակոցներ՝ իրենց բաղկացուցիչ մաս կազմող 13 մեկնարկային վառոդային լիցքերով, հրազեն հանդիսացող 40մմ տրամաչափի «РПГ-7В» տեսակի նռնականետ։Այս փաստով Մանվել Գրիգորյանի նկատմամբ հարուցված քրեական գործի նախաքննությունն ավարտվել է, գործն ուղարկվել է դատարան։
Մանվել Գրիգորյանին դիտավորյալ խոշտանգել են. հայտարարել է փաստաբանը
