ԵՐԵՎԱՆ, 4 մայիսի — Sputnik. Տարածքային կառավարման և զարգացման նախարար Սուրեն Պապիկյանը վստահեցնում է` չի կարող հրահանգ լինել` զանգահարել դպրոցների տնօրեններին ու հարցնել, թե ինչու չեն մասնակցել Քաղաքացու օրվան նվիրված միջոցառումներին։ Նման կարծիք հայտնեց Պապիկյանը լրագրողների հետ զրույցում։
Վանաձորի դպրոցների մի շարք տնօրեններ նամակ են գրել «Լոռի» հեռուստաընկերությանը և հայտնել, որ իրենց զանգել ու հարցրել են, թե ինչու չեն մասնակցել Քաղաքացու օրվան նվիրված միջոցառումներին։
«Ես նման ինֆորմացիայի չեմ տիրապետում, բայց նման բան պաշտոնապես լինել չի կարող։ Իսկ եթե որևէ պաշտոնյա նման քայլ է կատարել, բնականաբար, դա կունենա իր հետևանքները, և սա վերաբերում է բոլոր մարզերին»,–ասաց նախարարը։
Նրա խոսքով` այդ ժամանակներն անցել են, որ զանգեն տնօրեններին ու հրահանգեն միջոցառման մասնակցել։ Նա, դիմելով տնօրեններին, նշեց, որ բարձրաձայնեն նման խնդիրների մասին, եթե եղել են նման դեպքեր:
Հիշեցնենք, որ նամակում դպրոցի տնօրենները նշել էին, որ վիրավորված են նման վերաբերմունքից։
