ԵՐԵՎԱՆ, 3 մայիսի — Sputnik. Երևանում ընթացող «Գինու օրեր» փառատոնին երեկոյան մասնակցել են նաև ՀՀ վարչապետ Նիկոլ Փաշինյանը` կնոջ` Աննա Հակոբյանի հետ։
Այս մասին վարչապետը տեղեկացրեց Facebook-ի իր ուղիղ հեռարձակման միջոցով` հավելելով, որ ուզում էր այստեղ տիրող խելահեղ մթնոլորտը փոխանցել իր հետևորդներին։
«Կարծում էինք, որ ուշ ենք իջել «Գինու փառատոնն» ավարտված կլինի, բայց այստեղ ամեն ինչ դեռ նոր է սկսվում, ու աննկարագրելի մթնոլորտ է»,–ասաց Նիկոլ Փաշինյանը` հավելելով, որ այս տարի արդեն փառատոնը հասել է մինչև Մոսկովյան փողոց։
Նրանց հայտնվելու պես Սարյան փողոցում միջոցառումն էլ ավելի մեծ թափ ստացավ, մարդիկ սկսեցին հավաքվել վարչապետի շուրջ և լուսանկարվել նրա հետ։
Sputnik Արմենիա ռադիոկայանի մեկնաբան Հովհաննես Շողիկյանը վարչապետին բաժակ նվիրեց` այսպիսով հեշտացնելով նրա` գինի վայելելու հնարավորությունը։ Վարչապետը սիրով ընդունեց այն։
««Գինու օրերը» դարձել են մեր երկրի կարևորագույն բրենդներից մեկը։ Արտերկրում, ով լսում է և այս օրերին չի եղել այստեղ, հաջորդ տարի պլանավորեք, որ գաք»,–ասաց ՀՀ վարչապետն` ուրախությամբ փաստելով, որ այս տարի է «Գինու փառատոնին» բազմաթիվ օտարերկրյա զբոսաշրջիկներ են մասնակցում։
Հիշեցնենք, որ Երևանի Պուշկին, Թումանյան և Սարյան փողոցները մայիսի 3–ին և 4–ին փակ են։ Այստեղ նշում են «Գինու օրերը»։ Մայրաքաղաքի հյուրերն ու բնակիչները հնարավորություն ունեն միասին վայելելու հայկական գինու ավելի քան 200 տեսակ։
