ԵՐԵՎԱՆ, 3 մայիսի – Sputnik. Հայաստանում խստացնելու են վարորդական իրավունքի տրման կարգը։ Այսօր լրագրողների հետ զրույցում այս մասին ասաց Ճանապարհային ոստիկանության պետ Եգոր Կարապետյանը։
«Հարցաշարի հարցերն ավելի են շատանալու, 600 հարց է, մոտենալու է 1000-ին: Հիմա բացառում ենք գումարով վարորդական իրավունք գնելու դեպքերը»,- ասաց նա:
Լրագրողները հետաքրքրվեցին, թե նախկինում կաշառքով գնած վկայականների հարցն ի՞նչ լուծում է ստանալու, արդյո՞ք վարորդները զրկվելու են այդ վկայականներից։
«Եթե նախկինում նման դեպքեր եղել են, ապա համապատասխան ծառայությունները զբաղվել են, և համապատասխան մարդիկ պատասխանատվության են ենթարկվել, իսկ այդ մարդիկ էլ զրկվել են վարորդական իրավունքներից»,– ասաց պաշտոնյան:
Կարապետյանը խոսեց նաև տեսախցիկների մասին` նշելով, որ որևէ տեսախցիկ չի հանվել։
«Միայն սահմանված 68 կմ/ժամից ցածր արագություն ֆիքսող արագաչափերն են հանվել»,– ասաց նա:
Ինչ վերաբերում է գծանշումներին, ապա ՃՈ պետի խոսքով` այս տարի եղանակի անբարենպաստ լինելու պատճառով չեն կարողացել գծանշումներն ավելի շուտ անել։
«Ասֆալտի ջերմաստիճանը պետք է համապատասխան ջերմության լինի, որպեսզի ներկելուց հետո ներկը դուրս չգա»,– ասաց նա:
Ըստ Կարապետյանի` արդեն տասն օր է՝ գծանշման աշխատանքները սկսվել են, աշխատանքներն իրականացվում են գիշերային ժամերին:
