ԵՐԵՎԱՆ, 2 մայիսի — Sputnik. Ռուսաստանի արտգործնախարար Սերգեյ Լավրովը հայտարարել է, որ Ռուսաստանը մտադիր է Վենեսուելա ԱՄՆ–ի ռազմական ներխուժմանը հակազդող երկրների խումբ ստեղծել։ Այս մասին հայտնում է ՌԻԱ Նովոստին։
«Նման խումբ է ձևավորվում ՄԱԿ–ում, և ես հույս ունեմ, որ այն լուրջ աջակցություն կստանա, քանի որ խոսքը շատ պարզ բանի մասին է՝ հիմնարար նորմերի պաշտպանություն և միջազգային իրավունքի սկզբունքներ, ինչպես դրանք գրված են ՄԱԿ–ի կանոնակարգում. դժվար է խեղաթյուրել այդ թեման», – ընդգծել է Լավրովը։
Ավելի վաղ Վենեսուելայի նախագահ Նիկոլաս Մադուրոն կարգադրել էր հետաքննել պետական հեղաշրջման փորձերը։
Երեքշաբթի առավոտյան Վենեսուելայի ընդդիմության առաջնորդ Խուան Գուաիդոն և նրա համախոհները հավաքվել էին Կառլոտա ռազմակայանի դիմաց գտնվող ավտամայրուղու վրա։ Գուաիդոն կոչ էր արել ժողովրդին փողոց դուրս գալ և աջակցություն էր խոստացել զինվորականների կողմից։ Նա հայտարարել էր, որ գործող իշխանությանը տապալելուն ուղղված «Ազատություն» օպերացիան, եզրափակիչ փուլ է թևակոխում։ Ընդդիմության գործողություններին աջակցել է ԱՄՆ–ն։ Սակայն բանակը գործող նախագահին չդավաճանեց։
Վենեսուելայում հունվարի 21-ին զանգվածային բողոքի ցույցեր էին սկսվել գործող նախագահ Մադուրոյի դեմ, նրա երդմնակալության արարողությունից քիչ անց։ Անկարգությունների մեկնարկից հետո խորհրդարանի ընդդիմադիր խոսնակ Խուան Գուաիդոն իրեն պետության ժամանակավոր ղեկավար էր հռչակել։ ԱՄՆ–ի գլխավորությամբ Արևմուտքի մի շարք երկրներ հայտարարեցին Գուաիդոյին ճանաչելու մասին։ Մադուրոն իր հերթին խորհրդարանի ղեկավարին ԱՄՆ–ի խամաճիկ էր անվանել։ Ռուսաստանը, Չինաստանը և մի շարք այլ երկրներ սատարեցին Մադուրոյին որպես Վենեսուելայի լեգիտիմ նախագահ։
