«Կան ծրագրեր, որոնք հատվածական միտված են հանրակրթության որակը բարելավելուն, բայց փաստացի տեսնում ենք, որ ունենք շատ թերացումներ, և դրանով է պայմանավորված նաև բարեփոխումների այն փաթեթը, որը նախատեսված է հանրակրթության ոլորտում»,- Sputnik Արմենիայի եթերում նշում է կրթության ու գիտության նախարարի տեղակալը։
Փոխնախարարի խոսքով` մասնավորապես կրթության բովանդակության հետ կապված բարեփոխումները նախատեսում են առարկայական ծրագրեր, համապատասխան դասագրքեր, գնահատման և ուսուցիչների վերապատրաստման ու պատրաստման համակարգ։
«Ամենակարևորը մեր ուսուցիչներն են։ Ունենք շատ լավ ուսուցիչներ, որոնցից անընդհատ կարելի է սովորել, և որոնք իսկապես հիացնում են իրենց աշխատանքով, նաև ունենք ուսուցիչներ, որոնց վստահաբար պետք է տանք հնարավորություն, որպեսզի նրանք իրենց ունակությունները, գիտելիքն ու հմտությունները բարելավեն»,-ասում է Արևիկ Անափիոսյանը։
Անափիոսյանը փաստում է, որ ուսուցիչների վերապատրաստման համակարգում կարևոր է նաև կապը ուսուցիչների և վերապատրաստողների հետ։
