ԵՐԵՎԱՆ, 29 ապրիլի — Sputnik. Հայաստանի քրեակատարողական հիմնարկների մասին ԱԱԾ տարածած տեսանյութի վերաբերյալ վերջնական գնահատականը կտա ծառայողական քննությունը։ Այսօր լրագրողների հետ հանդիպմանը, պատասխանելով ԱԱԾ հրապարակման մասին հարցին, ասաց Արդարադատության նախարար Արտակ Զեյնալյանը։
«Ծառայողական քննություն է նշանակված, որը այդ բոլոր հարցերի պատասխանը կտա` դրանք համապատասխանում են իրականությանը, թե՞ ոչ, որ մասն է համապատասխանում իրականությանը, որը` ոչ, որ մասն է չափազանցված, կամ չչափազանցված»,– ասաց նախարարը։
Արտակ Զեյնալյանը հայտարարեց, որ ՔԿՀ–ներում այսօր չկա որևէ խուց, որը չի խուզարկվում, չկա դատապարտյալ, ով նախկինի պես արտոնյալ է և նրանից իրեր չեն առգրավվում։«Նախկին բարքերը, ըստ որի ՔԿՀ–ում ընթացիկ վերանորոգում անելու համար գումարը ստացվում էր այսպես կոչված` «նայողից» , վերացված են։ Նրանց այդ գործառույթը` ներսում գումարներ հավաքագրելու, վերացված է։ Մահճակալների համար վճարներ չկան, ներսում գումարներ չեն շրջանառում»,– ասաց Զեյնալյանը։
Ինչ վերաբերում է ԱԱԾ տարածած տեսանյութում ներկայացվող խցերի բաց դռներին, Արտակ Զեյնալյանը հայտնեց, որ դռան բաց լինելը պետք է լինի իրավաչափ։ «Եթե խուցը դատարկ է, դրա դռան բաց կամ փակ լինելը որևէ նշանակություն չունի»,– ասաց նա` հավելելով, որ նախ պետք է պարզել` այդ խուցը տվյալ պահին դատարկ է եղել, թե բնակեցված։
Արդարադատության նախարարը նաև հայտնեց, որ այսօր որոշ ՔԿՀ–ներում օդափոխության համակարգը բացակայում է, կան ջրամատակարարման համակարգի խափանման դեպքեր, որոնց հետևանքով ՔԿՀ աշխատակիցները ստիպված են լինում բացել կերակրադռները` խցերում անհրաժեշտ օդափոխություն ապահովելու համար։
Կան նաև դեպքեր, երբ աշխատակիցները ստիպված են լինում բաց թողել դռները, քանի որ ՔԿՀ–ներում ստանդարտները չպահպանելու հետևանքով չեն կարողանում տեսադաշտում պահել ամբողջ խցի տարածքը։ Կամ աշխատակիցների սահմանված թվից ցածր լինելու հետևանքով, մեկ աշխատակիցը իրավիճակը վերահսկելու համար ստիպված է լինում դուռը բաց պահել։
Այդուհանդերձ, Արտակ Զեյնալյանը չցանկացավ գնահատել ԱԱԾ տարածած տեսանյութում ներկայցված փաստերը` հորդորելով սպասել ծառայողական քննության ավարտին։
Հիշեցնենք` ապրիլի 23-ին ԱԱԾ աշխատակիցները քրեակատարողական հիմնարկներում կատարված անսպասելի խուզարկությունների արդյունքում որոշ կալանավորների խցերում՝ ներկառուցված թաքստոցներում, հայտնաբերվել են Wi-Fi սարքեր, պլանշետներ, հեռախոսաքարտեր, բջջային հեռախոսներ:
Կալանավայրի որոշ խցերում բաց են եղել կերակրադռները («волчок»), առանձին կալանավորներ, ըստ ԱԱԾ–ի, պահվել են արտոնյալ պայմաններում, իսկ մասնաշենքերից մեկի «զոն նայողի» խուցն առհասարակ բաց է եղել, և նա կանգնած է եղել դրսի կողմից մուտքի մոտ:
