Հայաստանը ներկայացնող գյումրեցի Սաթենիկ Գևորգյանը` ծնողական խնամքից զուրկ մնացած երեխաների համար «Ты супер! Суперсезон» երգի միջազգային շոուի կիսաեզրափակիչ ելույթին պատրաստվելու ընթացքում հայտարարեց, որ շատ հուզիչ երգ կկատարի։ Խոսքը Նարգիզի և Մաքսիմ Ֆադեևի հայտնի «Мы вдвоем» երգի մասին էր։
Նախորդ համերգին Մոսկվայում Սաթենիկը հիանալի ելույթ էր ունեցել։ Հաջող ելույթի շնորհիվ էր նա կիսաեզրափակիչ անցել։ Երիտասարդ հայուհին Մոսկվա է ժամանել դեռ մարտի 5-ին, և ողջ այս ընթացքում ակտիվորեն նախապատրաստվել էր իր աստղային ժամին։
«Բարև բոլորին, ես Սաթենիկն եմ Գևորգյան։ Հիմա ձեզ ցույց կտամ, թե ինչ ենք անում նախքան բեմ դուրս գալը։ Մենք այստեղ գնում ենք մեյքափի։ Մեզ գեղեցկացնում են։ Բայց նախքան բեմ դուրս գալը ինձ պարտադիր դիմահարդարում են։ Դե լավ գնացինք։ Ցույց տամ, թե հետո ես ինչ եմ անում։ Այստեղ պետք է շատ կամաց խոսել կամ ընդհանրապես չխոսել։ Ահա սյուները, իրանք շատ գեղեցիկ են։ Շատ սիրուն դեկորացիա է լինելու։ Իրոք շատ սիրուն», – հիացած աչքերով ասել է աղջիկը նախապատրաստվելու ընթացքում։
Նա նաև մեջքի հետևում ոսկեգույն կոշիկներ էր պահել և ծիծաղելով ասաց հաղորդավարուհուն, որ «այն ընդհանրապես սարսափելի է», սակայն եթե անհրաժեշտ է, ինքը կհագնի դրանք։
«Ես կատարելու եմ շատ ռոմանտիկ, շատ հուզիչ, շատ զգացմունքային երգ։ Շատ եմ հուզվում, ամեն ինչ լավ է լինելու։ Հուսով եմ` ինչպես միշտ։ Ցանկանում եմ բոլորին հաջողություն, սեր, համերաշխություն։ Ինչ լինելու է, լինի։ Առաջ աստված», – ասել է Սաթենիկը։
Երբ աղջիկն իմացավ, որ եզրափակիչ չի անցել, հայտարարեց, որ չի վհատվել, քանի որ շատ էր ցանկանում տուն վերադառնալ։
«Անկեղծ ասած, շատ էի ուզում տուն գնալ։ Ինձ համար սա մեծ պատիվ էր նորից մասնակցել երրորդ սեզոնին, որը կոչվում է սուպեր սեզոն։ Բոլորիդ շատ սիրում եմ, բոլորիդ շատ հարգում եմ։ Բոլոր ֆինալիստներին ցանկանում եմ հաջողություն, մեծ սեր, երջանկություն ու ամենակարևորը` իրենք կարողանան լավ ելույթ ունենալ, բոլորին շատ սիրում եմ», – ասել է Սաթենիկը։
«Ты супер! Суперсезон»–ի 5 մասնակից անցան եզրափակիչ փուլ, նրանց թվում նաև` մեր հայրենկից Դանիիլ Խաչատուրովը, որը ներկայացնում է Ռուսաստանը։
Հիշեցնենք` գյումրեցի մասնակից Սաթենիկ Գևորգյանը ներկայացնում էր մեր երկիրը մրցույթի երկրորդ եթերաշրջանում։ Առաջին եթերաշրջանում Հայաստանը ներկայացնում էին Սաբինա Մանվելյանը Վանաձորից և Անգելինա Պապիկյանը Գումրիից։
«Ты супер!» մրցույթն անցկացնում են ՆՏՎ հեռուստաընկերությունը և Sputnik միջազգային տեղեկատվական գործակալությունն ու ռադիոկայանը` ՌԴ լուսավորության նախարարության աջակցությամբ։
