ԵՐԵՎԱՆ, 27 ապրիլի — Sputnik. Ռուսաստանցի միլիարդատեր, «Տաշիր» ընկերությունների խմբի սեփականատեր Սամվել Կարապետյանի դուստրը՝ Տաթևիկ Կարապետյանը, Tatler ամսագրին տված հարցազրույցում պատմել է ընտանեկան բիզնեսի և տղամարդկանց հետ շփվելու կարողության մասին։ Գործարար կինը խոստովանել է, որ երբեք աշխատանքի չի գնում առանց դիմահարդարման և խնամված սանրվածքի, որովհետև օրվա ընթացքում հանդիպում է բազմաթիվ մարդկանց հետ, և դժվար է ուրիշներից պահանջել այն, ինչ ինքը չունի։
Տաթևիկ Կարապետյանն առաջին անգամ խոսել է ամուսնալուծության մասին
Տաթևիկի խոսքով՝ 18 տարեկանում սկսել է զբաղվել ընտանեկան գործով և ինքն էլ ընտրել է ուղղությունը, որը նրան առավել ստեղծարար է թվացել՝ կինոթատրոնների բիզնեսը։ Տաթևիկը նաև պատմել է ժամանակակից կինոբիզնեսի մասին` նշելով, որ «Գահերի խաղի» նման սերիալները թեև իրադարձություն են դարձել աշխարհում, սակայն հազիվ թե նման նախագծերին հաջողվի կինոթատրոններից դուրս մղել լիամետրաժ կինոնկարները։
Կուռքերի մասին խոսելիս նա նշել է, որ իր համար գլխավոր օրինակը հայրն է՝ Սամվել Կարապետյանը։
«Ես նրա հետ ծանոթ եմ 28 տարի, և նրա առօրյան, նրա արժեհամակարգը չեն փոխվել։ Միայն կատարելագործվել են։ Այդ օրինակը ես տեսել եմ մորս մոտ, որը գնացել է նրա (Սամվել Կարապետյանի՝ խմբ․) նախանշած ուղղությամբ, որովհետև նրա կինն է․ իմ արժեհամակարգում միայն այդպես է հնարավոր», - ասել է նա։
Ավելի վաղ «Տաշիր» ընկերությունների խմբի փոխնախագահ Տաթևիկ Կարապետյանն ընդգրկվել էր Ռուսաստանի 100 լավագույն երիտասարդ ղեկավարների ցուցակում։
