Այդ համատեքստում Սաֆրաստյանը նշում է, որ Ցեղասպանությունը դատապարտելու գործընթացը տեղի է ունենում և՛ Սիրիայում, և՛ Եգիպտոսում։
«Էրդողանի հայտարարությունը, թե հայերը սպանել են մահմեդական կանանց, նպատակ ունի մահմեդական աշխարհին համախմբել Թուրքիայի ժխտողական քաղաքականության շուրջ»,-ասում է թուրքագետը։
Ռուբեն Սաֆրաստյանը փաստում է, որ Եգիպտոսի ներկա իշխանությունների կողմից Հայոց ցեղասպանության խնդրով հետաքրքրվելու պատճառը Կահիրեի և Անկարայի լարված հարաբերություններն են։
Հայաստանի վարչապետ Նիկոլ Փաշինյանը Twitter սոցիալական ցանցի իր միկրոբլոգում Թուրքիայի նախագահ Ռեջեփ Թայիփ Էրդողանի ապրիլի 24-ի ելույթն անվանել էր ծայրահեղ ատելության խոսք։
«Օսմանյան կայսրության հայ բնակչությանը, որը դատապարտվեց զանգվածային սպանդի ու մահվան երթերի, «հայ հրոսակներ ու նրանց աջակիցներ» անվանելը, 1.5 միլիոն մարդ սպանելն ու դա «ամենատրամաբանական վարքագիծ» որակելը ոչ միայն ժխտողականության նոր մակարդակ է, այլև՝ մի ողջ ազգի սպանդի արդարացում»,– գրել էր Փաշինյանը:
