ԵՐԵՎԱՆ, 27 ապրիլի — Sputnik. Ապրիլի 27-ն ապրիլյան պատերազմի առաջին զոհերից մեկի`Քյարամ Սլոյանի ծննդյան օրն է։ Այդ առիթով հերոսի ծննդավայր Արտաշավան գյուղում (Արագածոտնի մարզ) բացվեց հուշարձան` ի հիշատակ 2016թ–ի ապրիլյան պատերազմի զոհերի։
Միջոցառման մասնակիցներն իրենց ելույթներում հիշեցին Արցախյան պատերազմի բոլոր մասնակիցներին ու խնկարկեցին բոլոր զոհերի հիշատակը։
Միջոցառման մասնակիցները ցավով արձանագրեցին, որ հուշարձանի բացման արարողությանը Արագածոտնի մարզպետարանի ոչ մի պաշտոնյա ներկա չէր։
Քյարամ Սլոյանը ծնվել է 1996 թվականի ապրիլի 27-ին, բանակ է զորակոչվել 2014 թվականին։
2016 թվականի ապրիլի 2-ին, երբ Ադրբեջանի զինված ուժերն արցախա-ադրբեջանական շփման գծի ողջ երկայնքով հարձակում գործեցին Արցախի վրա, 4 օր տևած պատերազմի առաջին զոհերի թվում սպանվեց նաև Քյարամ Սլոյանը։
Նրա մահվան մասին պաշտոնապես հայտարարվեց միայն 2016 թվականի ապրիլի 5-ին։
Ապրիլյան պատերազմի մեկ այլ հերոսի` կապիտան Արմենակ Ուրֆանյանի հրամանատարությամբ զինվորական ծառայություն անցնող Քյարամ Սլոյանն իր զինակիցների հետ երկու անգամ հետ է մղել հակառակորդի գրոհը։ Բայց երբ դիմակայությունն անհնար է դարձել, Արմենակ Ուրֆանյանն իր զինվորներին հրամայել է հեռանալ առաջնագծից, Քյարամ Սլոյանը, Անդրանիկ Զոհրաբյանն ու Ռոբերտ Աբաջյանը հրաժարվել են կատարել հրամանն ու մինչև վերջ մնացել հրամանատարի կողքին։
Սլոյանը վիրավորել է, երբ փորձել է կրակի գծից դուրս բերել ծանր վիրավորված հրամանատարին։ Բազմաթիվ հրազենային վնասվածքներ ստանալուց հետո Քյարամ Սլոյանը հակառակորդի ձեռամբ խոշտանգվել ու գլխատվել է։
Սլոյանը պարգևատրվել է ԼՂՀ «Մարտական ծառայության» մեդալով և Հայաստանի Հանրապետության «Մարտական խաչ» 1-ին աստիճանի պետական շքանշանով։
