ԵՐԵՎԱՆ, 26 ապրիլի — Sputnik. Եվրամիության երկրները զգալի արտոնություններ կստանան իրանական շուկայում։ Այսօր Sputnik Արմենիա մամուլի կենտրոնում կայացած Մոսկվա – Երևան տեսակապի ընթացքում այս մասին ասաց ՌԴ տնտեսական զարգացման փոխնախարար Տիմուր Մաքսիմովը։
Ապրիլի 30–ին ՌԴ վարչապետ Դմիտրի Մեդվեդևը Հայաստան է ժամանելու։ ԵԱՏՄ մասնակից այլ երկրների գործընկերների հետ նա կմասնակցի Եվրասիական տնտեսական միության միջկառավարական խորհրդի նիստին։ Նիստի ընթացքում կառավարությունների ղեկավարները կքննարկեն նաև ԵԱՏՄ– Իրան առևտրային արտոնությունների մասին համաձայնագրի ուժի մեջ մտնելու հարցը։
Հայաստանն ու Ռուսաստանն արդեն վավերացրել են այդ համաձայնագիրը։ Շուտով այն կվավերացնեն նաև ԵԱՏՄ բոլոր հինգ պետությունները։
Համաձայնագիրը թույլ կտա հեշտացնել մի շարք ապրանքների արտահանումը Իրան։ Այդ միջոցով կարելի է միլիարդավոր դոլարներ շահել, բայց այդ եկամուտների համար մրցում են նաև խոշոր և ուժեղ երկրները։ Մաքսիմովն ընդգծեց, որ այդ եկամուտներն ավելի հեշտ կկարողանան ստանալ այն երկրները, որոնք ուզում են բարեկամական հարաբերություններ ունենալ Թեհրանի հետ։
«Ռուսաստանը երբեք չի համարել, որ Իրանի դեմ պատժամիջոցները միջազգային են։ Դրանք ՄԱԿ–ում չեն ընդունվել։ Նշանակում է` ոչ թե միջազգային են, այլ մեկ պետության սահմանած միակողմանի միջոցներ։ Մենք միշտ դա հաշվի ենք առել Իրանի հետ մեր քաղաքականության մեջ։ Իսկ Հայաստանը կարող է շահող դուրս գալ Իրանի հետ հին առևտրական կապերի ու ընդհանուր ցամաքային սահմանի շնորհիվ», – ընդգծեց նա։
Նշենք, որ ըստ համաձայնագրի` կողմերը նվազեցրել ու զրոյացրել են մի շարք ապրանքների մաքսային տուրքերը։ Հայաստանի համար, մասնավորապես, հետաքրքրական է հանքային ջրի ու ոսկերչական իրերի տուրքերի նվազեցումը։
