ԵՐԵՎԱՆ, 24 ապրիլի — Sputnik. Հայաստանն արդեն մասամբ վճարել է ռուսական Սու-30 կործանիչների առաքման համար։ Լրագրողներին այս մասին ասել է պաշտպանության նախարար Դավիթ Տոնոյանը։
«Առաջին փուլում կլինեն չորս մեքենաներ, մենք արդեն վճարել ենք գումարի մի մասը», – նշել է նա։
Նախարարի խոսքով` Հայաստանը կշարունակի ռուսական սպառազինությունների գնման գործընթացը։
«Շարունակելու ենք սպառազինվել և վերազինվել։ Ամեն դեպքում ռուսական զենքի գնումները կշարունակվեն», – ավելացրել է Տոնոյանը։
Ավելի վաղ Հայաստանի պաշտպանության նախարարության մամուլի ծառայությունից Sputnik Արմենիային հայտնել էին, որ մտադիր են գնել Սու-30ՍՄ կործանիչներ։
ՀՀ պաշտպանության նախարար Դավիթ Տոնոյանի գլխավորած պատվիրակությունը մասնակցում է ապրիլի 23-ից 25-ը Մոսկվայում անցկացվող միջազգային անվտանգության հարցերով 8-րդ համաժողովին:
