«Շատ լավ կլինի, որ մենք ունենանք տեղական ավիափոխադրող, այսինքն` մասնավոր հատվածն այդ բեռն իր ուսերին վերցնի, ստեղծի ավիաընկերություն, Հայաստանում ինքնաթիռներ բազավորի, որպեսզի հայ օդաչուները վերադառնան մեր երկիր և այստեղ աշխատեն»,-Sputnik Արմենիայի եթերում ասում է քաղավիացիայի կոմիտեի նախագահը։
Ըստ Տաթևիկ Ռևազյանի, պետությունը չի կարողանա ճիշտ կառավարել ավիաընկերությունը, հետևաբար, այդ գործը պետք է իրականացնեն մասնավոր ընկերությունները։
«Այսօր Հայաստանից չվերթներ է իրականացնում միայն «Արմենիա» ավիաընկերությունը, հույս կա, որ շուտով «Տարոն ավիա» ընկերությունը ևս չվերթներ կիրականացնի Հայաստանից»,-նշում է քաղավիացայի պատասխանատուն։
Տաթևիկ Ռևազյանի խոսքով, իրենք ակտիվորեն շփվում են տարբեր երկրների քաղավիացիայի մարմինների, տարբեր ավիաընկերությունների հետ` փորձելով ընդօրինակել լավագույն փորձը։ Բացի այդ, Հայաստանի Քաղաքացիական ավիացիայի կոմիտեն այսօր ոլորտի խնդիրների, մասնավորապես, մատուցվող ծառայությունների գները նվազեցնելու շուրջ քննարկումներ է իրականացնում «Զվարթնոց» և «Շիրակ» օդանավակայանների կառավարումը ստանձնած «Կորպորասիան Արմենիա» ընկերության հետ։
Ապրիլի 22-ին ԵՊՀ-ի տնտեսագիտական ֆակուլտետում հանդիպման ժամանակ վարչապետ Նիկոլ Փաշինյանը հայտարարել էր, որ ազգային կամ պետական ավիափոխադրող ունենալը մեզ համար ստրատեգիական հարց է։ «Բայց մեր պատկերացումն այն չէ, որ մենք նման կարգավիճակ շնորհենք որևէ ընկերության, ինչպես որ նախկինում ունեցել ենք նման անհաջող փորձ»,–ասել էր վարչապետը։ Նա ընդգծել էր, որ եթե տեղական որևէ փոխադրողի համար պայմաններ են ստեղծվում, նույն պայմաններից պետք է օգտվեն նաև բոլոր տեղական ընկերությունները։
