Ուկրաինայի նորընտիր նախագահի նախընտրական հռետորաբանությունը մեղմ ասած դուրեկան չէր Ռուսաստանի համար, բայց դա նախընտրական գործընթաց էր և հնարավոր է, որ Զելենսկին վերանայի այդ հռետորաբանությունը։
Sputnik Արմենիայի հետ զրույցում ասել է քաղաքական գործիչ Արամ Սարգսյանը։
«Զելենսկին պետք է պարտադրված գնա Ռուսաստանի հետ հարաբերությունների վերանայման, որովհետև նախորդ իշխանությունը տանուլ տվեց նաև այդ պատճառով։ Զելենսկին պետք է դաս քաղի և հասկանա, որ պարտադիր է ունենալ հարևանի հետ լավ հարաբերություններ»,-ասել է Սարգսյանը։
Արամ Սարգսյանի գնահատմամբ, եթե Ուկրաինան մնալու է ԱՄՆ-ի ազդեցության տակ, բարդ է լինելու ձևավորել անկախ արտաքին քաղաքականություն։ Իսկ սուվերեն երկրի ամենագլխավոր խնդիրն է ունենալ արտաքին քաղաքականություն, որը ի շահ իր երկրի և ժողովրդի է ծառայում։
Արամ Սարգսյանը կարծում է, որ բավական բարդ իրավիճակում է նոր նախագահը․ նա կառավարման փորձ ընդհանրապես չունի, ընդամենը եղել է դերասան և այս վիճակում դժվար է պատկերացնել, թե այդ անփորձ թիմը ինչպես պետք է ղեկավարի երկիրը՝ հաշվի առնելով լարված իրավիճակը Ուկրաինայի արևելյան հատվածներում։
Ինչ վերաբերում է հայ-ուկրաինական հարաբերություններին՝ Սարգսյանի կարծիքով մեր հարաբերությունները որոշակիորեն սառել են։ Դա պայմանավորված է այն հանգամանքով, որ Ուկրաինան ավելի բարիդրացիական հարաբերություներ ունի Ադրբեջանի հետ և նրան զենք է մատակարարում։
Քաղաքական գործիչը սակայն հույս ունի, որ հայ-ուկրաինական հարաբերությունները կջերմանան։ Հայկական կողմից ձեռքը մեկնված է, կարևոր է, որ նորընտիր նախագահը այդ ձեռքը սեղմի։
