ԵՐԵՎԱՆ, 22 ապրիլի – Sputnik. Երևանի ընդհանուր իրավասության դատարանը որոշեց ԵԿՄ նախկին նախագահ, ԱԺ նախկին պատգամավոր Մանվել Գրիգորյանին պահել կալանքի տակ։
Դատարանը` դատավոր Մարինե Մելքոնյանի նախագահությամբ, մերժեց պաշտպանների` 10 միլիոն դրամ գրավի դիմաց Մանվել Գրիգորյանին ազատ արձակելու միջնորդությունը:
Դատական նիստից հետո լրագրողների հետ զրույցում, մեկնաբանելով դատարանի որոշումը, փաստաբան Արսեն Մկրտչյանն ասաց. «Անակնկալ չէր, նախորդ նիստին կանխատեսել էի»։
Հիշեցնենք` 2018թ.-ի հունիսի 16-ին կատարված խուզարկություններով, ԱԱԾ–ն Արմավիրի մարզի Արշալույս գյուղի Գրիգորյաններին պատկանող առանձնատներում հայտնաբերել էր 17 606 հատ տարբեր տրամաչափի փամփուշտ, 20 հատ «Փ-1» տեսակի ձեռքի բեկորային մարտական նռնակ, 20 «УЗРГМ-2» տեսակի մարտական պայթուցիչներ, 18 հատ կրակոցներ՝ իրենց բաղկացուցիչ մաս կազմող 13 մեկնարկային վառոդային լիցքերով, հրազեն հանդիսացող 40մմ տրամաչափի «РПГ-7В» տեսակի նռնականետ։
Այս փաստով Մանվել Գրիգորյանի նկատմամբ հարուցված քրեական գործի նախաքննությունն ավարտվել է, գործն ուղարկվել է դատարան։
Ըստ դատական տեղեկատվական համակարգում հրապարակված տեղեկությունների` դատարանում Մանվել Գրիգորյանն ամբաստանյալի աթոռին մենակ չի լինի. նրա հետ նույն դատական գործով ամբաստանյալի կարգավիճակում է նաև կինը` Նազիկ Ամիրյանը։
Քրեական գործով բացահայտված փաստերով` Մանվել Գրիգորյանն իր անօրինական զինանոցը ձեռք է բերել կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ։
Արման Գրիգորյանի նկատմամբ հայտարարվել է հետախուզում։
