Նանա Մարտիրոսյան, Sputnik Արմենիա
Աշխարհահռչակ դաշնակահար Ալեքսանդր Ռոմանովսկու հետ հանդիպումը նշանակված էր ուղիղ կեսօրին։ Սովորության համաձայն` ավելի շուտ տեղ հասանք։ Փորձ էր անում։ Կանգնեցինք դահլիճի մոտ ու լսում էինք` ինչպես է նա նվագում։ Երկար ժամանակ չէինք համարձակվում ներս մտնել. չէինք ուզում խանգարել։ Ամոթի զգացումը հաղթահարելով` դուռը մի փոքր բացեցինք և սկսեցինք լուսանկարել։ Ռոմանովսկին ժպտաց և ջերմորեն ողջունեց մեզ։
![«Առանց դրա վատ է». դաշնակահար Ռոմանովսկին` Հայաստանի, դասական և փոփ երաժշտության մասին «Առանց դրա վատ է». դաշնակահար Ռոմանովսկին` Հայաստանի, դասական և փոփ երաժշտության մասին - Sputnik Արմենիա](https://cdn.am.sputniknews.ru/img/1820/55/18205577_0:0:1600:1068_600x0_80_0_0_c760887a1d96f51b42d5432367253839.jpg)
Որոշեցի հարցազրույցն անցկացնել հենց գործիքի մոտ։ Ալեքսանդրը չընդդիմացավ։ Փակեց դաշնամուրի փեղկը, թիկնեց աթոռին։ Նա պատրաստ էր զրույցին, մենք` նույնպես։
Սկսեցինք զրուցել Հայաստանի մասին։ Ասաց` հայ հանդիսատեսը ջերմ է, բացի դրանից, Հայաստանը Իտալիան է հիշեցնում, որտեղ նա ապրել է տևական ժամանակ։ Հայկական խոհանոցն էլ է հիշեցնում իտալականը, որովհետև նույն սկզբունքն է կիրառվում. բոլոր ուտեստները պատրաստվում են որակյալ և թարմ մթերքներից։
![«Առանց դրա վատ է». դաշնակահար Ռոմանովսկին` Հայաստանի, դասական և փոփ երաժշտության մասին «Առանց դրա վատ է». դաշնակահար Ռոմանովսկին` Հայաստանի, դասական և փոփ երաժշտության մասին - Sputnik Արմենիա](https://cdn.am.sputniknews.ru/img/1820/56/18205639_0:0:1600:1067_600x0_80_0_0_4f214ffef02af63b91583d0f0346cc85.jpg)
Դաշնակահարը սիրում է լավաշ, տոլմա և, իհարկե խորոված. թեև խոստովանում է, որ չի կարողանում նույնիսկ մեկ օր ապրել առանց պաստայի (մակարոն)։ Նա հասցրել է լինել Գառնիում, Գեղարդում, Խոր Վիրապում, բայց ամենից շատ մարդիկ են տպավորել նրան։
«Շատերն իտալացիներին քննադատում են իրենց անճշտապահության համար։ Բայց նրանք կարողանում են իսկական մարդկային հարաբերություններ ստեղծել և գնահատել դրանք, նրանք անկեղծորեն շահագրգռված են, որ դու քեզ լավ զգաս, նույնիսկ եթե դու անծանոթ ես։ Նրանք տարբերվում են իրենց հյուրընկալությամբ։ Նույնը Հայաստանում է», – ասում է Ռոմանովսկին։
![«Առանց դրա վատ է». դաշնակահար Ռոմանովսկին` Հայաստանի, դասական և փոփ երաժշտության մասին «Առանց դրա վատ է». դաշնակահար Ռոմանովսկին` Հայաստանի, դասական և փոփ երաժշտության մասին - Sputnik Արմենիա](https://cdn.am.sputniknews.ru/img/1817/32/18173229_0:0:1600:1068_600x0_80_0_0_b6d2e012f760c890ecf8b254c0b5ac56.jpg)
Նրան դուր է գալիս նաև հայկական երաժշտությունը, հատկապես Արամ Խաչատրյանի ու Միքայել Թարիվերդիևի արվեստը։ Ընդհանրապես կյանքն առանց երաժշտության չի պատկերացնում։ Դաշնակահարը պատմում է, որ երաժշտությունն աստիճանաբար է մտել իր կյանք։ Ամեն ինչ սկսվել է արվեստի դպրոցից, որտեղ 5 տարեկանում երգել է երգչախմբում և դաշնամուր նվագել։ Իսկ երբ ընտրության առաջ է կանգնել` երգել, թե՞ նվագել, ծնողների խորհրդին հետևելով` ընտրել է դաշնամուրը։
Միայն տարիներ անց է գիտակցել, որ ճիշտ ընտրություն է կատարել. սա այն գործիքն է, որի հնարավորություններն անսահման են։
«Մի դեպք պատահեց, և ես գիտակցեցի երաժշտության ուժը։ 6 տարեկան էի, և մեր բակի խուլիգան տղաները բռնեցին ինձ ու ձեռքիցս խլեցին խաղալիք ատրճանակս։ Հետո նրանք իմացան, որ ես երգում եմ, և նրանցից մեկն ուզեց, որ երգեմ։ Եվ ես երգեցի։ Եկեղեցական երաժշտություն էր։ Նրանց շատ դուր եկավ։ Խնդրեցին էլի երգեմ, բայց ես ասացի` կերգեմ միայն այն դեպքում, եթե վերադարձնեն ատրճանակը։ Հիանալի էր։ Փողոցային տղաները տարվեցին երաժշտությամբ, և այդ ժամանակ հասկացա, որ երաժշտությունը մեծ ուժ ունի», – պատմում է նա։
Երաժիշտը խոստովանում է, որ ամեն անգամ բեմ դուրս գալիս հուզվում է։ Նա համեմատում է բեմը պատերազմի դաշտի հետ։ Ինչպես բեմում, այնպես էլ պատերազմի դաշտում մարդիկ պետք է կարողանան կառավարել իրենց վախերը։ Դաշնակահարն ասում է, որ երաժշտությունը հաճախ է օգնում իրեն և, անկախ հոգեվիճակից կամ տրամադրությունից, միշտ նախևառաջ իր համար է նվագում։
![«Առանց դրա վատ է». դաշնակահար Ռոմանովսկին` Հայաստանի, դասական և փոփ երաժշտության մասին «Առանց դրա վատ է». դաշնակահար Ռոմանովսկին` Հայաստանի, դասական և փոփ երաժշտության մասին - Sputnik Արմենիա](https://cdn.am.sputniknews.ru/img/1817/32/18173214_0:0:1600:1068_600x0_80_0_0_58c66a4cb5e4b7a545660cfa772479b9.jpg)
«Ես առանց երաժշտության վատ եմ զգում։ Կարծես շնչելու պես մի բան լինի, չէ՞ որ ես միշտ շնչում եմ, երբ լավ ու վատ եմ զգում ինձ։ Եվ սիրտս միշտ բաբախում է` արագ կամ դանդաղ։ Այդպես էլ երաժշտության հետ է, նույնիսկ երբ չեմ նվագում, գլխումս միշտ երաժշտություն է հնչում», – ասում է նա` մատներով հարվածելով դաշնամուրի փեղկին։
Ասում է, որ շատ տարբեր երաժշտություն է լսում, նրան հետաքրքրում են երաժշտական աշխարհի բոլոր նորությունները։ Այդ պահին ես փորձում եմ նրան «բռնել» իմ հանկարծակի հարցով։
– Իսկ «Цвет настроения черный» (Ֆիլիպ Կիրկորովի մասնակցությամբ Եգոր Կրիդի հիթը) երգը լսե՞լ եք։
– Իսկ ի՞նչ է դա, – շփոթված ժպտում է նա։
– Ռուսական փոփ երաժշտություն։
– Հա՞։ Այդ պահը բաց եմ թողել, – ծիծաղում է երաժիշտը։
Ասում է` դասական երաժշտության աշխարհում իսկական վառ արտիստների պակաս կա ։ Միևնույն ժամանակ հանրաճանաչ երաժշտության ժանրում կան շատ վառ, տաղանդավոր և իրենց գործն անկեղծորեն անող մարդիկ։ Կարևոր է, որ երաժիշտները փորձեն տպավորել հանդիսատեսին ոչ թե արտաքին էֆեկտներով, այլ իրենց պրոֆեսիոնալիզմի մակարդակով։
![«Առանց դրա վատ է». դաշնակահար Ռոմանովսկին` Հայաստանի, դասական և փոփ երաժշտության մասին «Առանց դրա վատ է». դաշնակահար Ռոմանովսկին` Հայաստանի, դասական և փոփ երաժշտության մասին - Sputnik Արմենիա](https://cdn.am.sputniknews.ru/img/1817/32/18173219_0:0:1600:1068_600x0_80_0_0_d1b988d773c6659032bf3fc908a7f328.jpg)
«Դասական երաժշտությունն ավելի շատ հնարավորություններ ունի, քան հայտնին։ Վերջինը լայն գետ է, որը ծովն է թափվում, իսկ դասական երաժշտությունը` գետի դելտան, որը բաժանվում է տասնյակ փոքրիկ վտակների։ Հարուստ աշխարհ է էքսպերիմենտների և տարատեսակ էմոցիոնալ վիճակների համար։ Եթե Մոցարտն ու Բեթհովենը ողջ լինեին, ապա նրանք իրենց վրա պակաս ուշադրություն չէին սևեռի, քան The Rolling Stones–ը կամ Ռիհաննան», – համոզված է երաժիշտը։
Նա կարծում է, որ երաժշտությունն իր նշանակությունն ունի, իսկ իր արվեստի ուղերձն է հիշեցնել որևէ իրական բանի գոյության, մարդու և աստծու կապի մասին։ Իսկ երաժշտությունը ս մերձեցման միջոց է։
Ի դեպ, եթե նա հանդիպի աստծուն, շնորհակալություն կհայտնի այն ամենի համար, ինչ ունի։