ԵՐԵՎԱՆ, 22 ապրիլի – Sputnik. Մթերային շուկայում չարաշահումներն ու ավիատոմսերի գները գտնվելու են տնտեսական մրցակցության պաշտպանության պետական հանձնաժողովի նորընտիր նախագահ Գեղամ Գևորգյանի ուշադրության կենտրոնում։ Այս մասին այսօր նա ասաց լրագրողների հետ զրույցում` խորհրդարանի կողմից իր թեկնածության հաստացումից անմիջապես հետո։
«Պատգամավորները մի շարք ոլորտներ են նշել ու խնդրել ստուգել։ Հիմնականում խոսքը սպառողների համար շատ կարևոր մթերային ոլորտի մասին է, բարձրացվել է նաև ավիատոմսերի գների հարցը», – ասաց Գևորգյանը։
Նրա խոսքով` Հանձնաժողովն արդեն մի շարք հետազոտություններ է նախաձեռնել, որոնք պետք է շարունակություն ստանան։
Նա ընդգծեց, որ մտադիր չէ առաջ տանել առանձին անձանց կամ շրջանակների շահերը։ Հանձնաժողովի նպատակն է աշխատել օրենքի շրջանակներում ու հանրության շահերի պաշտպանությունն ապահովվել։
Գեղամ Գևորգյանը ծանոթ է հանձնաժողովի աշխատանքին. նա այդ թեմայով թեկնածուական ատենախոսություն է պաշտպանել։
Նշենք, որ այսօր ՀՀ գյուղատնտեսության նախարարի պաշտոնակատար Գեղամ Գևորգյանը ընտրվեց ՀՀ Տնտեսական մրցակցության պաշտպանության պետական հանձնաժողովի (ՏՄՊՊՀ) նախագահի պաշտոնում։ Խորհրդարանում կայացած փակ գաղտնի քվեարկությամբ Գևորգյանն անցավ 95 կողմ ու 26 դեմ ձայներով։
