ԵՐԵՎԱՆ, 21 ապրիլի - Spitnik. Վրաստանի վարչապետ Մամուկա Բախտաձեն շնորհավորական հեռագիր է հղել երկրի բոլոր քաղաքացիներին, որոնք նշում են Սուրբ Զատիկը։ Այս մասին հայտնում է վարչապետի մամուլի ծառայությունը։
«Շնորհավորում եմ Քրիստոսի Հարության առթիվ մեր բոլոր այն քաղաքացիներին, որոնք նշում են այդ մեծ քրիստոնեական տոնը», - նշվում է հաղորդագրության մեջ։
Հիշեցնենք՝ Հայ Առաքելական եկեղեցին այսօր նշում է Հիսուս Քրիստոսի Սուրբ Հարության տոնը։
Ժամը 10:00-ից Հայ առաքելական եկեղեցիներում ժամերգություն է, Անդաստանի արարողություն է իրականացվում, հետո Սուրբ Պատարագ է մատուցվում։
Իսկ նախօրեին եկեղեցիներում ճրագալույցի արարողություն է անցկացվել։
Վրաստանի հայկական եկեղեցիները պահում են ավանդույթն ու այս օրերին նույնպես նշում են Սուրբ Զատիկը։
Ինչպես տեղեկանում ենք Հայ առաքելական եկեղեցու Վիրահայոց թեմի պաշտոնական կայքից, թեմում Քրիստոսի Սուրբ Հարության տոնը նշվել է հավատացյալների հոծ բազմության մասնակցությամբ ու Հայոց Եկեղեցու կանոններով և արարողակարգերին համապատասխան:
Ինչպես Ճրագալույցի երեկոյան, այնպես էլ Սուրբ Զատկի օրը Թբիլիսիում, Ռուսթավիում, Բաթումում, Սամցխե-Ջավախքում, Մառնեուլի, Ծալկայի և Թեթրիծղարոյի շրջաններում, հավատացյալ բազմության մասնակցությամբ, տեղ են ունեցել սրբազան արարողություններ:
