ԵՐԵՎԱՆ, 18 ապրիլի — Sputnik. Հայոց ցեղասպանության ճանաչումը պետք է օրենսդրորեն ամրագրել, դա կփոխի նաև Թուրքիայի պահվածքը։ Այս մասին AdnKronos իտալական պարբերականին տված հարցազրույցում ասել է Իտալիայի հայ համայնքի նախագահ Մինաս Լուռեանը։
Լուռեանը հավելել է, որ մի քանի օր առաջ Իտալիայի խորհրդարանի պատգամավորների պալատի` Հայոց ցեղասպանության ճանաչման բանաձևի ընդունմանը կարելի է արձագանքել միայն երախտիքով։
Նա նշել է, որ իրեն անսպասելի է պահել Forza Italia ընդդիմադիր խմբակցությունը. Սիլվիո Բեռլուսկոնիի կողմնակիցները որոշել են «կողմ» չքվեարկել։ Իսկ քվեարկությանը կառավարությունից ոչ ոք չէր եկել, դրանից բացի բանձևը քննարկելիս խորհրդարանը, ցավոք, հարկ չէր համարել խորհրդակցել հայ համայնքի հետ։
«Պետք է շնորհակալություն հայտնել նրանց, ովքեր օգնել են հասնել այդ փոքր առաջընթացին, բայց ես դրանից կոնկրետ փոփոխություններ չեմ ակնկալում», – հայտարարել է նա։
Պատգամավորների պալատը երկրորդ անգամ է ընդունում ցեղասպանության ճանաչումը (նման բանաձև արդեն ընդունվել է 2000թ–ին` խմբ.)։
Հիմա խորհրդարանը կառավարությանը հանձնարարել է պաշտոնապես ճանաչել Հայոց ցեղասպանությունը, բայց, Լուռեանի կարծիքով, այստեղ բանաձևն այդքան կարևոր չէ, որքան ավելի կոշտ փաստաթուղթը` օրենքը։ Նա վստահ է, որ նման քայլն ավելի բաց և միանշանակ կլինի, կստիպի Թուրքիային կրկին մտածել իր քաղաքականության մասին ։
Հիշեցնենք, որ ապրիլի 10–ին Իտալիայի խորհրդարանի պատգամավորների պալատը կրկնակի բանաձև է ընդունել Հայոց ցեղասպանությունը ճանաչելու մասին։
