ԵՐԵՎԱՆ, 18 ապրիլի – Sputnik. «Իմ քայլը» դաշինքի պատգամավոր Վահագն Հովակիմյանն այսօր խորհրդարանում ելույթ ունենալու ընթացքում հայտնեց, որ 16 տարվա պատգամավոր Գագիկ Ծառուկյանն առաջին անգամ խորհրդարանի ամբիոնից ելույթ է ունեցել այս տարվա հունվարին։ Նրա խոսքով` ընդդիմությունը մշտապես մեղադրանքներ է հնչեցնում նոր պաշտոնյաների ոչ կոմպետենտ լինելու վերաբերյալ, մարդկանց պիտակավորելու փորձեր են արվում։
«Պետք է հիշողություն ունենալ և հիշել, որ իրենց խմբակցության ղեկավարը (Գագիկ Ծառուկյանը – խմբ.), լինելով 16 տարվա պատգամավոր, առաջին անգամ այս ամբիոնից ելույթ է ունեցել այս տարվա հունվարին: Այդ խմբակցությունից միայն հինգ-վեց պատգամավորներ են ելույթ ունենում, ընդգրկվում միջազգային պատվիրակություններում, և դուք դեռ խոսո՞ւմ եք»,– ասաց Հովակիմյանը:
Նա ընդդիմադիր գործընկերներին խորհուրդ տվեց դիմացինի աչքի փուշը նկատելուց առաջ իրենց «գերանները» տեսնել:
Ավելի ուշ լրագրողների հետ զրույցում ԲՀԿ ղեկավար Գագիկ Ծառուկյանն արձագանքեց Հովակիմյանի ելույթին։
«Ամենակարևորը դատարկ–դատարկ խոսալը չի, այսօր ժողովուրդը սպասում է գործի, փոփոխությունների։ Ծառուկյանը քիչ ա ելույթ ունեցել։ Այ տղա, դու բանուգործ չունե՞ս, 10 անգամ գործից հանել, լարել են, էլի հետ ես եկել, խղճացել են, դու իրական կյանքում ինչ ես արել, դու Ծառուկյանի 0001 տոկոսը, իրական կյանքում արած չկաս։ Ոնց կարաս գաս ասես, թե Ծառուկյանը ելույթ չի ունեցել, բա Ծառուկյանի թիմը Ծառուկյանը չի», – ասաց Ծառուկյանը։
Լրագրողները հետաքրքրվեցին` Ծառուկյանն ԱԺ ամբիոնից ելույթ ունենալու իր աշխատաոճը կվերանայի՞։
«Ուրեմն իմ աշխատաոճը... Եթե ցանկացած պատգամավոր դրա գոնե 3 տոկոսը արած լիներ, այսօր մեր երկիրը կծաղկեր, կզարգանար»,– ասաց Ծառուկյանը։
Նշենք, որ Հովակիմյանը քննադատել է նաև «Լուսավոր Հայաստանի» պատգամավոր Էդմոն Մարուքյանին։
